Pu Ngun Tling Nih CNF Caah Ks. 18,000,000 Bawmhnak A Pek
The Chinland Post|2019 July 12| US khuasa Pu Ngun Tling nih Chin National Front (CNF/CNA) caah Kawlram tangka in ks. sing 180 (18,000,000_ $12,000) bawmhnak a pek hna tiah kan theih.
Hi bawmhnak kong he pehtlai in CNF upa Pu Daniel Sakhong nih a tanglei bantuk in a langhter.
CNF caah bawmhnak $12,000 a pe tu Pu Ngun Tling, CNA ralkap hlun Pu Nguncunglian Hrangtlung le Pu Vanceuuk Khenglawt le tiah lunch kan eiti.
An 3 in kan Chin miphun nih bochanmi kan pa le an si. Kum sau nawn i tawn lo hnu ah Indianapolis khua i a nai te ah tuahmi CNA ralkap hlun pawl i tonnak ah an rak phan i, nuamte in biaruahtinak le rawleitinak caan kan ngeih khawh hi a si.
CNA ah siseh, Chin Community ah siseh, Biaknak lei ah siseh hruaitu dirhmun in kum saupi a tuan ruang ah kan miphun, a bik in USA a ummi nih kan theih dih cangmi Pu Vanceuuk Khenglawt kong hi ka tial ti lai lo.
Pu Nguncunglian Hrangtlung cu Thantlang peng Thau khuami a si i, 1988 in CNA ah a lut. Kachin ram ah ralkap training a dih cangka in kawl ralkap he veitam tuk an ni phawmh. Kawl ralkap kuan nih a khen ruang ah hma fakngai in a rak in i a nunnak tiang a liam lai tiah ruah mi a si nain Pathian nih miphun caah nihin tiang a nunnak a kan zuahpiak rih. A pumchungah kuan tam pi nihin tiang a um rih. Kan Miphun ca i a rak in mi a hma pawl an thitpiak nak cu nihin tiang a hmai ah a tlau rih lo.
CNA ralkap cu a tuankho ti lo nain, nihin tiang an umnak ram Canada ah kan miphun rian cu ngol lo in a tuan. CNF caah mission riantuannak United Chin Christian Fellowship (UCCF) i, Canada ram caah chairman dirhmun in tuanvo a kan lakpiak. Miphun ca i a rak tuannak vialte cung ah kan ni lawm i upatnak kan pek.
CNF caah bawmhnak phaisa tampi a petu Pu Ngun Tling hi kan miphun nih kan i ngeihchun mirum pakhat a si. Tlangpi khuami a si i 1997 USA a rak phan. A hmasa ah cun Washington DC ah a rak um nain, a tu cu Columbus, Ohio ah Sushi dawr nganpi a cawk Columbus khua ah a um. Mitha, mi nunsiang a si i, CNF kum 30 chung tuanbia ah pumpak in tambik a bawmtu a si. $12,000 cu miphun dang caah cun a tamtuk zong a si men lai lo nain, kan Chin miphun caah cun a tam tak tak.
Camp Victoria ah a va kal i, bawmhnak a va pek hna hnu ah USA a rak kir i, CNF hmailei ngan chinchin in bawmh ding ah a riantuan lo in USA a khua kip ah mi a sawm. A tu hi a vak cuahmah. A rak phaknak nan umnak khua cio ah tonbiaruah khawh rak i zuam cio uh tiah kan sawm hna. Aa timh mi a tha, a ropui tuk!
Pu Ngun Tling thiltha a tuahmi nih tutan ah a thar in a langhter mi cu Chin miphun nih kan ram kan dawt, CNF kan tanh ko ti hi a si. Tutan zat hi a rak si lo nain nikum hawngkha $1,000 hrawng $2,000 hrawng in CNF ah pumpak in a pee mi an rak um len. Kan philh hna lo kan dohthlennak record ah chiah dih an si ko. A tu ah kan theih rih mi cu Kan miphun ah phaisa tangka leiin bochan deuh mi kan hawi le dang zong timhlamhnak an rak ngei cio ko ti mi thawngtha a si.
Midang sin zong in bawmhnak nganpi a ra lai ti ruahchannak a um rih. A kan bawm cang mi Pu Ngun Tling le a chungkhar nan cung ah kan i lawm tuk hringhran ee…Kan Chin dohthlennak tuanbia ah hi thiltha nan tuahnak record hi vawlei caan dongh hlan tiang a rak um zungzal ko lai.
Ref: Daniel Sakhong
About The Author
