Pu Thawng Zel; Khuangcawi Phunglam Dik Ahcun Ngaknu Hi Khuangcawi Phung An Si Lo
Tawk Tling Thang| 2019 January 31| Tukum Hakha ah tuah dingmi Chin Miphun Ni ah nutung pakhat khuangcawi an timhmi kong he pehtlai in Senthang peng, Surkhua mi upa pakhat nih khuangcawi phunglam dik taktak ahcun ngaknu hi khuangcawi phung an si lo, nutung hi cawi an si tiah The Chinland Post ah a chim.
“Khuangcawi hi Senthang peng, Phaizawng khua in aa thawk tiah kan upate nih an kan chimh. Hlan ahcun khuang an rak i cawi tikah ngaknu hi an rak i cawi bal lo. A ruang cu khuangcawi phunglam le a thawhkehnak hrimhrim ahhin nutung lawngte an rak i cawi. Hlan ahcun mahte in khuang i cawi a rak si. An pasal le nihkhan an nupi kha upatnak peknak caah an cawi hna. Vok sumh 6 an thah, zupu an dah. Cun, Siakawng an thah i a ti kho deuhmi nih khuapi te in tlang an zamh hna. Asinain, nihin ahcun mahte in khuang i cawi a um tuk ti lo. Zohdawh in khuapi vantlang nih cawi deuh a si cang caah ngaknu zong an cawi cang hna nak hi a si. Ngaknu cawi zong cu a sualnak ka hngal lo nain khuangcawi phung taktak ahcun nutung hi cawi an si” tiah Surkhuami Pu Thawng Zel nih The Chinland Post ah a chim.
“Tukum Hakha ah tuahdingmi Chin Miphun Ni ah Senthang upa hna nih Pi Nun Can Sung khuangcawi siseh kan tinak a ruang bik zong hi midang kan fial hna ahcun a kiltu ding pa hi midang fial than zong a hau. Cucaah, amah cawi siseh law a pasal nih kil beh seh ti kan duh ruang ah a si. Cun, Pu Lai Luai Hmung a phun hi phun bawi le phun thiang a simi Thianhlun phun an si fawn” tiah Pu Thawng Zel nih a biapeh ah a chimchap.
Senthang peng ah khuangcawi a rak thawktu hi Phaizawng khuami Pu Mang Sui a si. Pu Mang Sui hi Pu Lai Luai Hmung te he hin pehtlaihnak a ngeimi zong an si tiah kan theih.
Pi Nun Can Sung hi pasal a ngeih hnu, 2009 kum Phaizawng khua ah tuahmi Chin Miphun Ni ah khuang an rak cawi bal cang tiah kan theih.
Pi Nun Can Sung (kum 36) a chuahkehnak cu Thantlang peng, Congthia khuami Pu Zung Mang le Pi Far Vang fanu a si. Amah hi Senthang peng, Phaizawng khuami Pu Lai Luai Hmung he an i thitum hnu ah fapa pathum le fanu pakhat kan ngei. Pu Lai Luai Hmung hi Phaizawng khuami Pu Thang Nawn (tleicia) le Pi Ni Zi fapa a si. Amah a phun hi Thianhlun phun an si.
Tukum Chin ramkulh huap in Hakha ah tuahdingmi Chin Miphun Ni ah Myanmar rampi President U Win Myint zong an sawm.
2017 kum avoi 69nak Chin Miphun Ni ah Hakha Khuathar in Mai Biak Tha Cuai khuangcawi a rak si. 2018 kum ah Hakha Khuahlun in Mai Run Sung an rak cawi. 2019 kum ahcun Senthang nih tuanvo laak in Pi Nun Can Sung an cawi lai.
About The Author
