Pu Thla Hre ; Hakha Myoma Market Sakmi Foundation A That Lo Caah A Thar In Domh Than Ding A Si

Salai Ngun San Aung| 2018 January 16| Design Excel Development Company nih an tuan liomi Hakha Myoma Market cu foundation an chiahmi a that lo caah a thar in domh ding an ti hna i chikkhat rian an i din chung tiah kan theih.

Hi kong ah ramkulh sipin lutlai Pu Thla Hre nih, “nai te ah a chiatthat kan va zoh i lungtling a si lo caah a thar in domh than ding a si. Chikhat nan rian tuanmi ngol chung rih uh kan ti hna. Hi inn pi hi a tlawm lei in ton 400 tluk a rit lai, cun dawr thil, dawr hngaktu minung le thil caw mi vialte khing kha a si lai tikah quality a that taktak a hau. Cucaah tu hi Technical lei Consultant kan auh lai. Cucu Third Party bantuk in hohmanh mithmai zoh lo tein an rian a chekfel tu ding an si lai. Consultant caah Tender kan auh lai i Tender a hmu kho tu an um hnu in rian cu domh than a si te lai” tiah TCP ah a chim.

Hi market inn pi saknak ca ahhin Cozah nih sing 8000MMK a pek i dawrkhan zuar man in sing 1300, a dihlak fonh ah sing 9300 in sak dingmi a si. 2017-2018 tangka kum chung bawmhnak in sak ding a si caah 2018 chung ah pello lim ding a si tiah kan theih. +++