Pu Zing Cung Nih Yangon- Chin Miphun Ni Ah Miphun Kong Biacahnak A Ngeih Lai

Tawk Tling Thang | 2019 February 4| A ralimi February 20, Yangon ah tuah dingmi Chin Miphun Ni ni ah Chin National Front (CNF) Chairman Pu Zing Cung nih miphun kong biacahnak a ngeih hna lai tiah kan theih.

Hi kong he pehtlai in ACSY (All Chin Society Yangon) haotu Peter Cung nih, “Tukum, Yangon ah kan tuah dingmi Chin Miphun Ni ah miphun kong biacah chimtu ding ah CNF Chairman Pu Zing Cung kan sawm. Amah zong nih ka rak tlung hrimhrim lai i caan kan hmanpi ko hna lai tiin bia a kan leh cang” tiah The Chinland Post ah a chim.

Tukum ACSY tawlrelnak in Yangon ah tuahdingmi Chin Miphun Ni cu February 18 in an thawk lai. February 18 le 19 ah lentecelh zuamnak a phunphun an tuah lai. February 20 ah Chin Miphun Ni caanhmannak an ngei lai. Hi ni ah CNF in Chairman Pu Zing Cung nih Miphun kong biacah chimnak a ngeih lai. ACSY nih 2018 kum Chin Person of The Year caah an thimmi Myanmar ramkomh Vice President Henry Van Thio upatnak laksawng peknak an ngeih lai.

Cun, 5D (Distinction) in a cunglei he tanghra awngmi siseh, Ph.D degree a lami (Secular and Religion) upatnak Roca peknak, rampi aiawh in lentecelhnak aa zuammi upatnak Roca peknak, rampi aiawh in dawh aa zuammi ngaknu tlangval le hlasak thiam hna upatnak Roca peknak, Deputy General Director le Director rian a tuan khomi upatnak Roca peknak tibantuk zong an ngei chih lai tiah kan theih.

Na ruahning rak langhter ve.. (Leave a comment)

%d bloggers like this: