Kyaw Le Gangaw Kar Mei A Rawkmi An Remh Khawh I Gangaw, Kalay Le Khaikam Cu Mei An Ngah Cang
City Hunter| 2018 April 4| April 3 chun in 66KV line ma-ha-dat-aa line Kyaw le Gangaw kar mei a rawkmi cu April 4 zingka ah an remh khawh cang caah Gangaw, Kalay le Khaikam cu mei a ngah cang. Hakha, Thantlang le Falam zong tuan ah a ngah chom ve ko lai tiah Chin ramkulh Electric (EPC) zung in kan theih.
Hi kong he pehtlai in Chin ramkulh Electric zung lutlai Pu Zo Khai Thawng nih The Chinland Post ah atu bantuk in thil sining fianternak a chim.
“April 3 chun in zan suimilam 1:00am tiang Kyaw le Gangaw mei 66KV line mei a rawkmi cu kan naule nih an kawl i tu zingka khan an hmuh. Kyaw le Gangaw kar mei a rawkmi cu suimilam 9:00 tluk ahkhan an remh khawh cang i atu hi Gangaw, Kalay le Khaikam cu ma-ha-dat-aa mei a ngah cang”.
“Gangaw le Hakha kar in a rawk than. Khuazei in dah a rawh kan hngal kho rih lo, atu hi an kawl cuahmah liopi a si. Fakpi in cun a rawk lai lo, a rauh hlan ah a rawhnak hmuh le ser colh a si ko lai. Cucaah, tuan ah Hakha, Thantlang le Falam zong ma-ha-dat-aa mei a ngah ve ko lai. Atu Kyaw le Gangaw kar a rawkmi zong hi ramlak tuhmawng tang thingkung, thingnge nih a nenh ruang ah a si” tiah Chin ramkulh Electric zung in lutlai Pu Zo Khai Thawng nihcun a biapeh ah a chimchih.
April 3, ruah a sur, tek a tlami nih Kyaw in laakmi 66KV line- ma-ha-dat-aa line mei cu a rawk. Cu ruang ah April 3 chun in April 4 zingka tiang Gangaw, Kalay, Khaikam, Hakha, Falam le Thantlang cu mei a mit dih. April 4 zingka in Gangaw, Kalay le Khaikam cu mei a ngah than cang. April 4, suimilam 10:55m tiang Hakha, Falam le Thantlang cu mei a ngah rih lo.
About The Author
