Pu Zo Tum Hmung; Rung Lian Ceu Hi CYO Chin Person of the Year 2019 Pek Ding A Si
Tawk Tling Thang| 2019 March 13| Pu Zo Tum Hmung nih paihthiam, pathawng Rung Lian Ceu cu CYO Chin Person of the Year 2019 pek phu taktak a sinak kong a chim.
Hi kong he pehtlai in Pu Zo Tum Hmung nih, “ Rung Lian Ceu cu CYO Chin Person of the Year 2019 pek phu taktak a si. Nagaland aa Paihmi Laksawng a hmuhmi chungin Rs. 60,000 cu CNF ah a pek. Miphun le ram dawtnak thinlung a ngeihnak (patriotism) a langhter. Hi bantuk lungput hi kan miphun nih tihal le rawltam in a herhmi lungput a si. Ramdang le Miphun dang Nagaland, India tiang a va kal zong uar a um. Nikum Hakha CND i aa paih dih in CYO Chin Person of the Year pek phu a si, ka rak ti cang” tiah social media ah a langhter.
March 7 ah tuahmi Nagaland State Open Wrestling- minung 60 renglo zuamcawh paih zuamnak ah aa pai i pathumnak le paih dawh bik laksawng a co. March 7 ah tuahmi Naga paih zuamnak ah mizapi thapetu tambik a ngeitu le mizapi nih an uar bikmi a si. Aa paimi chung ah amah tluk in khuami nih hman aa thlakpimi an um lo.
Naga paih zuamnak ah pathumnak laksawng Rs. 100,000 (Kyats 2,000,000 tluk) le paih dawh bik laksawng Rs. 10,000 (Kyats 200,000 tluk) laksawng a comi zong CNF/A ah Rs. 60,000 (Kyats 1,200,000 tluk) a hlut. A taangmi vialte zong amah nih fangkhat hmanh i laak lo in midang a hlut dih hna.
Pu Zo Tum Hmung nih nikum ah Rung Lian Ceu Chin Person of the Year pek awk aa tlaknak kong phun 7 in a rak langhter. Cu hna cu;
- USA in kan khualipi Hakha ah a tlung. Mah lungput hi ka uar.
- Aa paih lai paoh ah tha tein kut a tlaih hna. A tei hna tik zongah a tlaih than hna. Hihi lentecelh (sports) lungput cu a si.
- A titsa hrimhrim zoh aa dawh (2013 kum aa paih lio tha tein ka zoh, Indianapolis ah).
- Paih a thiam; a thawng fawn.
- A mithmai a panh kho zungzal. A zohtu mizapi tha a damter.
- Tukum Chin Miphun Ni cu amah thawng in a hlunghlai deuh; mizapi kan i nuam.
- Paih chung a luh tik paoh ah thla a cam. Teinak a hmuh tik zongah thla a cam. Hi bantuk nun hi zohchunh awk tlak nun cu a si. Boxing thongh thiam minthang taktak Manny Pacquiao a lo tiah a langhter.
Rung Lian Ceu hi voi 15 aa pai i voi 12 bual a co cangmi a si. Rung Lian Ceu cu Hakha peng, Chuncung khuami Pu Si Hmung le Pi Tum Zing fapa a si. A chuahpi unau pa pathum le nu pahnih an si. Rung Lian Ceu hi 1994 July 3, Chuncung khua ah a chuak. 2006 December 16 kum ah Malaysia a phan. 2007 September 13 ah USA a phan. Amah hi Taxes, Amarillo college pakhat ah Automotive Technology (Auto-Technician Engineering) a kaimi a si.
Hika ah Naga ah aa paihnak Lian Live nih a thlakmi video zoh khawh a si.
Pu Zo Tum Hmung hi Ethnic Nationalities for Affairs Centre ah Executive Director a tuan liomi a si. Chin National Front (CNF) ah adviser a si. Chin Man of the Year voihnih a co bal cang. CYO, North America nih Chin Man of the Year thimnak an tuahnak ah committee lutlai a rak tuanpiak bal hna.
Video Credit: Lian Live
About The Author
