Pyin Oo Lwin-Mogok Lam Ah SAC Ralkap le MDY PDF Karlak Ah Kahdohnak A Chuak I Ralbawi Telh In 20 Hrawng An Thi, 30 Hrawng An I Hliam
The Chinland Post | 2023 October 16 — Shan ram, Nawnghkio peng, Dopin khua pawng, Pyin Oo Lwin-Mogok lam ah SAC ralkap pawl le MDY PDF pawl karlak ah kahdohnak a chuak i SAC ralkap 20 hrawng an thi, 30 hrawng an i hliam, hriam tampi zong an lak khawh tiah theih a si.
October 9 zinglei sml 9:30am hrawng ah Kanawng Operation min in Pyin Oo Lwin-Mogok lam, Dopin khua pawng ah a um mi SAC Brigade 101 kuttang LIB 252 le MDY PDF hna karlak ah kahdohnak a chuak, nikhat chung kahdohnak a fak i SAC lei 20 hrawng an thi, 30 hrawng an i hliam, PDF 3 an thi i SAC ralkap hriam pawl zong an lak khawh tiah theih a si.
Kahdohnak a dih hnu ah MDY PDF nih hmunhma zohfelnak an ngeih tik ah hriamngan pawl, Uniform pawl le ralkap ruak 6 zong an phum tiah theih a si.
MDY PDF nih Kanawng Operation min in July thla in September zarh 2 nak tiang kahdohnak an tuah i SAC ralbawi telh in 80 hrawng an thi cang, hriam tampi zong an lak khawh tiah Mandalay People’s Defense Force nih thawng an thanh.
