Pyithu Hluttaw Nih Thaizing Ah President An Thim Colh Cang Lai
City Hunter| 2018 March 22| President U Htin Kyaw cu a rian in a chuah caah amah zaka airawltu ding President cu March 23 ah Pyithu hluttaw nih an thim colh cang lai tiah Ramkomh hluttaw khuahun nih a thanh cang.
Atu a lawngmi President thutdan cu Pyithu hluttaw phu nih rak thimmi a si caah Pyithu hluttaw nih March 23 ah thim ding in caankarlak President U Myint Swe nih ramkomh hluttaw ah a chuahpi cang. Cuti a chuahpinak kong cu March 22 ah tuahmi ramkomh hluttaw tonpumhnak ah khuahun Man Win Khaing Than nih thanhnak a tuah.
Hi kong he pehtlai in Thantlang in Pyithu hluttaw palai Pi Ni Sui Lian nih, “March 23 ah Pyithu hluttaw nih Vice President caah palai pakhat kan thim lai. Kannih NLD party nihcun Pyithu hluttaw Speaker hlun U Win Myint kan kan thim ko lai. USDP party belte nih midang an rak chuahpi ve te hnga maw? Nihin hluttaw Speaker thimnak zong midang an chuahpi caah an chuahpi than khawh vemi a si. Pyithu hluttaw nih kan thimmi kha ramkomh hluttaw ah kan chuahpi than lai i atu lio Vice President Henry Van Thio le U Myint Swe he ramkomh hluttaw ah President an i cuh lai. Ramkomh hluttaw meeting zong March 26 ah tuahding in meeting auh kan si cang. Cucaah, President thar cu March 26 ah aa fiang te lai” tiah The Chinland Post ah a chim.
Hakha peng Amyotha hluttaw in MP Pu Ngun Hei nih, “Pyithu hluttaw Speaker U Win Myint tluk in rian a tuan khomi le amakmi hi hluttaw ah an um ti lai lo. Amah thawng in hluttaw upadi tampi ser le hluttaw nawlngeihnak tampi a um kho. Amah hi rampi President caah chuahpi ngam tlak taktak le a tuan kho dingmi zong a si. Hluttaw hrimhrim ahcun bochan tlak taktak a si. Amah hluttaw i a um ti lo dingmi tu hi kan thin a phang deuh” tiah The Chinland Post ah a chim.
NLD chimnak nawlngeitu le CEC chungtel upa hna nih President cu Pyithu hluttaw speaker hlun U Win Myint a si lai tiah an chim.
President U Htin Kyaw nih a rian a chuahtak ni thengmang te ah U Win Myint nih Pyithu hluttaw Speaker rian cu a chuahtak ve. Hihi President tuan aa timh caah a si hrimhrim ko lai tiah ramkhel riantuantu hna nih an ruahdamh cio.
About The Author
