Pyithu Hluttaw Nih Vice President Caah U Win Myint Le U Taung Aye An Chuahpi Cang Hna
City Hunter| 2018 March 23| March 23 ah tuahmi Pyithu hluttaw tonpumhnak ah a rian in aa phuakmi President U Htin Kyaw zaka airawltu ding Vice President caah Pyithu hluttaw Speaker hlun U Win Myint (NLD) le U Taung Aye (USDP) an chuahpi cang hna.
President si khawhnak ding tahfung an tling maw tling lo timi an chekfel hmasa rih hna lai. Cu chekfeltu ah Pale thimfung hmahma in Daw Khin San Hlaing an thim. Pyithu hluttaw tonpumhnak cu suimilam 10:30am ah an i din i suimilam 1:00pm ah an thawk than lai.
Chun suimilam 1:00 i hluttaw tonpumhnak an thawk tikah President si khawhnak tahfung an tlinh ko a si ahcun U Win Myint le U Taung Aye cu hluttaw nih mee thlaknak in an thim than hna lai. Mee tam deuh hmutu kha Pyithu hluttaw nih Vice President caah ramkomh hluttaw ah an chuahpi lai. Pyithu hluttaw nih chuahpimi Vice President pakhat le atu lio Vice President a tuan liomi Pu Henry Van Thio le U Myint Swe he ramkomh hluttaw ah President an i cuh lai. Mee tambik hmutu nih President rian le tuanvo cu a laak lai tiah theih a si.
Hi kong he pehtlai in Thantlang in Pyithu hluttaw palai Pi Ni Sui Lian nih, “Kannih NLD party nihcun Pyithu hluttaw Speaker hlun U Win Myint kan kan thim ko lai. Pyithu hluttaw nih kan thimmi kha ramkomh hluttaw ah kan chuahpi than lai i atu lio Vice President Henry Van Thio le U Myint Swe he ramkomh hluttaw ah President an i cuh lai. Ramkomh hluttaw meeting zong March 26 ah tuahding in meeting auh kan si cang. Cucaah, President thar cu March 26 ah aa fiang te lai” tiah The Chinland Post ah a chim.
Hakha peng Amyotha hluttaw in MP Pu Ngun Hei nih, “Pyithu hluttaw Speaker U Win Myint tluk in rian a tuan khomi le amakmi hi hluttaw ah an um ti lai lo. Amah thawng in hluttaw upadi tampi ser le hluttaw nawlngeihnak tampi a um kho. Amah hi rampi President caah chuahpi ngam tlak taktak le a tuan kho dingmi zong a si. Pyithu hluttaw palai NLD party nihcun amah hi mee kan pek dih ko lai” tiah The Chinland Post ah a chim.
U Win Myint hi President U Htin Kyaw he rian an chuahtak ni aa khat, March 21 veve ah a si. President i cuh ding in atu bantuk in Pyithu hluttaw Speaker rian vialte a kaltaknak le a chuahtaknak hi a si tiah kan theih.
About The Author
