Rakhine caah Kokang nih hriam an rak kan bawmh tiah AA Commander-in-Chief nih a chim

The Chinland Post | 2022 March 30 – Arakan Army (AA) nih dothlennak a rak thok lioah Myanmar National Democratic Alliance Army (MNDAA) hruaitu U Peng Jiasheng nih hriam 100 a rak kan bawmh tiah AA Commander-in-Chief Major-General Twan Mrat Naing nih a langhter.

Nichuah lei Shan, National Democratic Alliance Army (NDAA) nih tlaihmi hmunhma ah March 29 thok in nithum chung tuahmi U Phon Kya ruakhumhnak ah a chim.

2009 ah Rakhine mino 26 in thok a rak simi Rakhine dothlennak ah meithal zuun khat lawng kan rak ngei i harnak kan rak ton lioah meithal zuun 100 le RPG pahnih cu U Peng Jiasheng nih a voikhat bik laksawng an rak kan pek tiah Major-General Twan Mrat Naing nih a chim.

Kokang hriamtlai phu sin in ngahmi hriam nih Rakhine ram a nunter ṭhan i a tu ahcun battalion pakhat ah minung 300 in battalion a zaa leng dirh khawh a si cang leng ah hawikomh phu pawl he ral kan tuṭi kho cang tiah Major-General Twan Mrat Naing nih a chim.

Kokang hriamtlai phu cu AA le Ta’ang National Liberation Army (TNLA) caah a thukmi pehtlaihnak kan ngeih caah minung pumpak in ka rak conglawmhnak hi a si tiah Major-General Twan Mrat Naing nih a chim.

Kokang hriamtlai (MNDAA), Arakan Army (AA) le Ta’ang National Liberation Army (TNLA) hna cu hawikomh phu hna an si. 2015 Kokang kahdohnak ah AA le TNLA hriamtlai phu hna nih Kokang lei dir in kahdoh an bawmh tiah raltuknak ngiathlaitu pawl nih an chim.

U Peng Jiasheng cu Kokang Saw-Bua (Dynasty) chan ah hruaitu a rak ṭuan bel bantuk in Communist Pary (CPB) zong ah Commander a rak ṭuan bel.

Kum 94 a si cangmi U Peng Jiasheng cu February 16 ah chaklei Shan ram, China-Myanmar ramri MNDAA Headquarter ah a nunnak a liam. A ruakhumhnak cu NDAA nih a tlaihnak hmunhma ah March 29 ah tuah a si i China le Thai palai pawl, Tlangcung hriamtlai hruaitu pawl le SAC lei in Triangle hmunhma lei Superintendent a kai tiah theih a si.

Na ruahning rak langhter ve.. (Leave a comment)

%d bloggers like this: