Rakhine ram ah SAC ralkap cawlcanghnak a tam chin thluahmah
The Chinland Post | 2022 March 19 – Rakhine ram ah kahdohnak a um lo nain, a tu zarch chung hrawngah SAC ralkap pawl cu khuapi sang le khuate hna ah lut in zohfelnak le tlaihkhihnak an tuah tiah khuami hna nih an chim.
A luancia March 9 ah Battalion-55 in ralkap pawl cu Taungkoh peng, Paukinn khua ah lut in March 10 ah khuami pakhat U Maung Hla Shwe cu an tlaih i an kalpi tiah a nupi a simi Daw Ma Aye Pyone nih a chim.
U Maung Hla Shwe cu Taungkoh khua palik sakhaan nih che-hti a zuar tiah sual an phawt tiah a nupi a simi Daw Ma Aye Pyone nih Western News ah a chim.
“March 15 ah phone an kan chawnh i na vapa palik sakhaan a phan. che-hti a zuar tiah sual an phawt. March 29 ah baceih ding in an kan auh. Article zeizah in dah sual an phawt bal cu theih a si lo” tiah a chim.
March 14 zong ah SAC ralkap thazang 70 hrawng cu Yanbye peng, Laytaung khua ah an raa i khuabawi cheukhat hna kha zohfelnak an ngeih hna tiah khuami hna nih an chim.
Zohfel ding ah auh a tongmi khuabawi cheukhat hna cu i zohfel ter duh loin khuapi lei ah an zaam tiah theih a si.
A tlizaam mi khuabawi hna cu SAC ralkap nih phu hnih ṭhen in Laytaung khua, No.3 sang ah a ummi tlang hna ah an kawl hna tiah min langhter a duh lomi khuami pakhat nih a chim.
“ SAC ralkap pawl cu March 16 tiang zong an kir rih lo. A zaammi pawl hi tlang cungah an i thup tiah dalan nih thawng an pek hna tiah an chim. SAC ralkap pawl nih tlang cungah an kawl lio hna a si”.
Cun Ann peng, Tattaung khua chung, Ann-Mae karlak, Kuzukaing khua hna ah SAC ralkap pawl cu mawṭaw in an i chawh len kha hmuh a si tiah Ann khuami Ko Myo Lwin nih a chim.
“Tukarhrawng Tattaung khua ahcun, SAC ralkap pawl thuam tling tein an i chawk lengmang. Zohfelnak hauka hna ah an hrang tuk. Kyaukmyaung lei ah drone hna an thlah. Asinain, khua chungah lut in zohfelnak an tuah le tuah lo cu theih a si lo” tiah a chim.
Rakhine ram, Ponnagyun peng, Kwantaung khua le Padetha khua lei ah SAC ralkap le palik pawl fonh in cawlcanghnak an ngeih caah thinphang a si tiah khuami hna nih an chim.
Ref: Western News
About The Author
