Rakhine Ram Chung Khuate Khuabawi 11 Nih Rian An Chuahtak Than
TCP Thantlang| 2019 March 5| Rakhine ramchung, Mrauk-U peng khuate khuabawi hna cu a luancia 2019 March 1 ah minung 89 nih rian phuahnak ca an chiah hnu ah minung 11 nih a thar in rianphuahnak ca an chiah than ve tiah kan theih.
Rakhine ram khuate khuabawi hna cu tapung(ralhrang) hna he pehtlaih nak nan ngei ti ruangah tlaihkhih mi zong an um caah March 1 ni ah khuabawi minung 89 hna cu an mah tein rianphuah dingin ca an chiah hnu ah March 4 ah minung 11 nih rian phuahnak ca an chiah than ve hi a si.
“Tu ni ah mithar minung 11 rian dinh dingin Mrauk-U peng zungah ca kan chiah ve cang. Khuabawi tel cheukhat hna cu ralhrang hna nih tlaih in an kal pi cang hna caah kan mah lei in humhimnak lei ah thinphang a si cang. Upadi ningin le luatnak a um fawn lo tikah khuabawi rian hi pehzulh in kan tuan zuam ti lo caah a tu bantuk in kan rian in chuah kan duhnak le ca kan chiahnak cu a si” tiah Mrauk-U peng khaute khuabawi Maung Kyaw Win nih a chim.
Avoi khatnak rian dinh dingin zeiruang ah dah a tu minung 11 hna hi an i tel lo i ca an chiah lo nak a ruang cu mah hna pawl hi tuah deuh meeting chungah an i tel khawh lo caah a si tiah kan theih.
A luancia Febuary 28 lio ah Mrauk-U peng chungah khuate kuabawi 4 hna cu ralkap hna nih tlaih in an rak kal pi hna pin ah dan an rak tat bal hna.
March 1 lio ah Mrauk-U peng khuate khuabawi minung 89 rian dinhnak ca a rak tial mi hna cu upadi ning le an mah duhthim tein phuahnak ca tial mi a si lo pin ah mi pakhat ruahnak le chihruahnak thawngin rian dinhnak ca chiah mi an si hna caah an rian in dihter dingin penguk zung nih nawl kan pe hna lai lo tiah Director U The Maung nih a chim.
Ref:DVB
About The Author
