Rakhine Ramkulh Ah Missionary A Tuanmi Pastor A Thi

TCP-Kalay| 2019 February 7| Gospel For Asia (GFA) nih missionary in Rakhine ramkulh ah an thlahmi Pastor Tun N. kum 41 cu January 19 ah khan Arakan Army (AA ralkap) pawl nih meithal hmuah in an kalpi i February 1 ah a thi tiah theih a si.

Amah lawng siloin midang an tlaihmi tampi zong an thah chih hna. Hiti an thah hna nak hi Rohingya le Rakhine an buainak hmun hrawnghrang a si. Pastor Tun N. hi kum 20 tluk missionary rian a tuan cangmi a si. Zarhhnih tluk a tlau hnu in Palek le cozah ralkap nih an kawl nain an hmu kho lo i February 1 ah a thihnak kong tu thawng an thanh hi a si.

Pastor Tun le a innchungkhar

A khrihfabu hi zumtu 50 hrawng an um i a nupi le a fale pathum a rauhtak hna. Myanmar ram chung dihlak ummi GFA chungtel Khrihfabu pawl le riantuantu hna nih tlawm an bulh hna i taantak mi chungkhar sinah thlacamnak le thazaang peknak an ngei tiah theih a si.

“Pastor Tun N. thihnak kong kan theih cu kan lungthin a kekkuai taktak. Zumtu vialte hna Pastor Tun N. nih kaltak mi chungkhar le Khrihfabu zong Pathian sin in a ra mi hnangamnak an hmuh khawh nakhnga thlacam piak cio ding kan in sawm hna” tiah Dr. KP Yohannan nih a chim.

Hika ah video zoh khawh a si.

Jesuh nih nannih cu cenghngia lak thlahmi tuufa bantuk nan si tiah a kan ti bantuk in Pastor Tun he rian a tuanti mi vialte zong nih hin Pastor Tun bantuk in an nunnak pek dingah timhcia an si ko tiah a chim chap.

GFA nih Kawlram ah hin Khrihfabu 500 tluk an ngei i cu vialte rian an tuannak ah tu Pastor Tun tlaihkhih le thlah a tonmi hi a hmasabik a si tiah kan theih.
Ref: Gospel For Asia

Na ruahning rak langhter ve.. (Leave a comment)

%d bloggers like this: