Ral Hmung Certual Cungah Shopping Mall Sak Kong Cozah nih Khuathar Tonnak A Ngeih Hna

Ral Hmung Certual le No. High School, Khuathar

Hakha Khuathar Ral Hmung Certual cungah Shopping Mall he pehtlai in Cozah nih Khuathar mizapi tonnak cu January 28, 2020 No.2 Sianginn ah a ngeih hna

“ Nizan January 29 Sipin nih Khuathar mizapi tonnak a kan ngeih. Meeting bantuk in tuah ciammam a si lo tikah ruahnak chim cio a si. Mino lei nihcun kan duhlonak lawng te kha kan chim. A donghnak bia a kan letmi cu Hakha khuathar um nanmah le mah tha tein va iceih ta ulaw cu hnu ah kan itong than lai a kan ti” tiah Hakha Khuathar Mino Bu Asst. Secretary Van Lal Cross Thang nih The Chinland Post ah a chim.

“Kan zapi tein theih ding ka  duh mi cu, Hakha hi Chinram chungah  khualipi pakhat a si i Laitlang zong ah ai dawh bik mi ram le Siangbawi te an lu an i phunnak hmun a si . Cucaah Hakha khua tha seh tiin upa hna nih khua an khan mi hi hrawh i timh hna hlah uh sih. Thil hi a lu le a taw tuak loin le  ning cang loin kan i thlak tik ah Hakha khua dawh te in ser ding mi zong a ser kho lo. Cucaah mipi kan lung a rual a herh, cu ti kan lung a rual lawng ah thiltha kan tuah mi chung ah thlachuah mi thil kan tuah kho lai. Hakha khualapi pakhat a si mi ah shooping mall um lo si ahcun zeitik hmanh khuapi dirhmun a phan kho lo ti kan ruah a hau. Tuchan ah cun khoika ram hmanh ah lamkam  thil zuar phun zong a si ti lo, shopping mall pakhat chung ah tling tein um lai i mipi nih an nuam tei le dawh tiin thil  herh mi cawk khawh a si ti cu vawilei ramkip ah hmuh khawh a si cang. Cucaah hi thil kan tuah kawh hlan chung cu kaa dang ramkulh le ramthen hna  kan tluk khawh hna lai loi mi tang ah kan si peng ko lai “ tiah Chin ramkulh Hluttaw Speaker Pu  Zobawi nih tonpumhnak ah a chim.

“Hakha mipi kan lung ai rual lawng ah Hakha pi hi a thancho lai i minung zong a sing kan phan te lai. Ramkhel i cuh  lio ah cun hopoah i soisel ding si ko nain a kai mi cozah cung ah kan i fonh ve a hau. Mah lawnglawng ah riantuannak a tlamtling lai. Hakha dawh seh tha seh ti cu kan duh nain kan tuah khawhnak lonak a raung cu kan mah lila hi kan si. Ka dang ah cun lungrual tein rian an tuan ti hna i zei party ti um lo caah an tuan mi rian ah an tlam a tling. Cozah thil timh mi dohtu le hnahnawhnak pek tu kan si ah zeitik hmanh ah kan ram a thancho kho lai” tiah a chim chap.

Hi kongah Hakha khuathar khuabawi Pu. Ram Lian nih “Khuathar mipi nih kan hnatlak cang mi kha, a dangdang a hngalh setsai lo mi nih Khuathar hi rak ngei hna sehlaw an mah ko khi ram thanchonak ah a fimbik le a sang bik zong khi va si hnasehlaw kan kherhhlai tluk an kherh hlai lo zapi nih hnatlakpi mi a si” tiah a chim. “Pu. Ral Hmun Certual hi Khuathar ta a si lo, fimcawnnak lei zung ta  a si,” tiah The Chinland Post interview ah a chim.

Hi kong he pehtlai in Salai Van Cung Lian nih “ Hakha mino nih duhlonak minthut 1003 an ngahnak le Shopping mall a um ahcun rian a ngahmi, rian a tam lai nain khat lei ahcun Hakha dawr thil vialte an manh tuk ti lai. Inntek mi tangka luhnak a tlawm thluahmah lai” tiah The Chinland Post capar ah a langhter.

“Khuathar certual kan sunsaknak cu a hlan Primary sianginn kanngei lio 1972-73 hrawngah siangngakchia lentecelh nak le artlan dirnak caah an rak cawhmi a si. 1978 kum in mah thazaang bak in rak cawhmi thanmi a si. 1997-8 kum ah Cozah Siangngakchia puai a um caah a herh tiah tlawmpal a remh. 2020 tiang ah Cozah nih zeihmanh an remh lo. Kumchiar khuathar nih Cozah sin puai ca nawl hal hau lo in zalong tein kan hman pengmi Khuathar inntek kan certual a si. Mah certual tlangtluan zongah kan upatmi kan pipu hna thlan tampi a um. Mah thazang le mizapi nih zalong tein kan hmanmi hmun a si caah kan duh lo. Cozah thar kai le cang ka in Certual hnu thawn in a hmailei innhmun kan zuar lai an ti kan duh lo. Nehemiah company zong nih an kan ti kan duh hlei lo. Shopping Mall hi Khuathar le khua nupa nih an halmi a si. Khua meeting an kan auh i minung 40 fai an kai.

Cu ahcun No.2 le Certual hi vawlei license tuah than siseh tiah an chah tiah kan theih. Naypidaw Vice President an va len. An kir hnu in zeihmanh kan theih tilo. Anmah tuah in an tuah. Khuathar nih nan ti khawh lai lo caah Sipin nih tlai seh an timi kha upa cheukhat nih an duh. Riantuanning hi Ramkulh Nawl in a kal lai caah inntek zeihmanh tlaknak nawl kanngei lailo. Design le developers ti tikah a um rihlo an ti. Asean Level kan saklai an ti fawn tikah a sikholomi kha kan zum hna lo. Khuathar EC nih mahcu kan ceih i kan duh lo. Sianginn pawng a si caah siangngakchia moral le cacawn ak a hrawh lai. Kokkung (Golf-ground) hmanh nih zudin le kuakzuk a rak kan cawnpiak. Game KTV massage tbk a um khomi a si caah Khuathar zeitluk kan rawh lai tihi kan tuak. Cozah Sianginn nih a ngeihmi a si caah nan iceih khawh lo an ti fawn. Zei thathnemnak dah kan ngei lai ti tikah vawlei man lawng a a kai lai. Shopping um cu kan cohlan ko, Ralhmung Certual ahcun kan duh lo. Hi hi cu a dik lo kan doh peng lai duhlonak le ramkomh cozah sin ca kan tial lai. 5star Hotel hna zong hmunhma nan kan pek thai lawngah kan saklai an ti an ti tikah khuaruat ngai ahau mi a si” tiah Chin Youth Organization President le Khuathar mino hruaitu upa Salai Van Cin Thang nih The Chinland Post ah a chim.

Na ruahning rak langhter ve.. (Leave a comment)

%d bloggers like this: