Ralhrang he biaruah ding kan tim lo, Hmailei caan zongah thihthih nunun in kan doh rih ko lai tiah: Salai Htet Ni
Post Staff| 2022 February 11 — Ralhrang ralkap nih fenhtermi 2008 Phunghram cu Chin National Front/Army (CNF/A) nih cohlan lo hrimhrim a sinak kong le hramhram in uknak lak in Min Aung Hlaing hruaimi ralhrang phu he biaruahnak kan ngei hrimhrim lai lo tiah Salai Htet Ni nih a chim.
Min Aung Hliang phu nih, Ramkomh Dirhni (Union Day) tuah dingmi timhnak kong zong ah CNF/A in palai thlah an tim lo i, kai zong an i timh lo tiah theih a si.
Mipi leiah a ṭangmi tlangcung hriamtlai phu vialte nih ralhrang sawmmi remdaih biaruahnak ah i tel hrimhrim lo dingin forhfialnak bia zong a chim.
“Ralhrang phu (anmah tein State Administration Council – SAC tiah a au mi) nih sawmmi ramkhel lei biaruahnak pawl i teltum cu, a tulio ram sining kan zoh ahcun mipi hruaimi dothlennak a si caah mipi lei kan ṭan a si ahcun an ka sawmnak le an kan auhnak pawl kha kan cohlan lo hrimhrim ding a si. 2008 Phunghram a cohlangmi nih cun an kai ko lai. Sihmanhsehlaw, kan nih CNF/A nih cun kan cohlan lo caah ceihhmainak ah kan i tel hrimhrim lai lo. Hramhram in uknak a lak ni thawkin Ralkap (SAC) he i ceihhmainak ngeih kan i tim hrimhrim lo. Mithmuh kuttongh kalpi dingah a si kho lo. Kal zong kan kal lai lo” tiah Salai Htet Ni nih Chinland Club, USA nih tuahmi Online biaruahnak ah a chim.
Min Aung Hlaing hruaimi ralhrang (SAC) phu nih February 12 ah a phanh in tuah dingmi Ramkomh Dirhni (Union Day) ah Democracy le Federal rampi sernak kong he pehtlai in tlangcung hriamtlai vialte sawm in remdaihnak kong ceih ding in an i tim tiah theih a si.
Cun, atulio dirhmun kong ah, “CNF/A hruainak tang ah raltuknak ṭhawng seh tiah Chinland Joint Defence Committee (CJDC) hi dirh a si. Cu CJDC tang ahcun ralkap hna samh in rak tuk si. Hmailei caan zongah thihthih nunun in kan doh rih ko lai tiah” Salai Htet Ni nih a chim.
Ralhrang (SAC) nih sawmi remdaihnak ceihmainak ah NCA minthu mi chung in, ALP le KNU/KNLA (Peace Council) hi kai an i tim i, RCSS (Shan), KNU (Karen) le CNF (Chin) tbk., le rampi kahdaihnak cahren (NCA) minthu lo mi chung in, KIO (Kachin), AA (Arakan), TNLA (Ta’ang) le MNDAA (Kokang) phufonh hna nih kan kai lai lo tiah theih a si.#
Biakilh: Chinland Club, USA nih February 8 ah Online biaruahnak an tuahmi ah Salai Htet Ni nih chimmi chung in tawinak in lakmi chung in tialmi a si. ~ Editor
About The Author
