Ralhrang SAC Rianṭuannak Vialte A Rawk Dih Deng Cang: Salai Htet Ni

Chin National Front (CNF) in Chimnak ngeitu Salai Htet Ni he Biaruahnak

The Chinland Post | 2022 March 21 – March 20 hi hramhram uknak le hramhram uktu vialte hrawh cikcek i zalonnak, tlukruannak le mahte khuakhan lairelnak a ummi Chin ram sersiam ṭhan le Federal Democracy ramkomh sernak caah Chin National Front (CNF) rak dirh in hriamtlaih dothlennak 34 a tlin ni a si.

Hramhram uktu hna i hramhram in an thiltuah ruangah Chin miphun vialte nih an sunghmi zatlang nun le Chinland sersiam ṭhannak caah mipi hriamtlai phu, hawikomh phu hna he i bawm in raltuknak i ruang tein ralhrang phu State Administration Council (SAC) kan hrawh cikcek lai tiah kum 34 nak Chij Miphun Dothlennak Ni ah CNF nih cathanh a chuah.

Cu kong telhchih in, a tulio Chinram i raltuknak sining he pehtlai in CNF biachimnak nawl a ngeitu Salai Htet Ni he biaruahnak a si.

Hika ah Khonumthung Burmese News link ah rel khawh a si. ~Editor

Khonumthung Burmese – Kum 34 tlinnak Chin Miphun Dothlennak ni cathanh ah Chinland sersiam ṭhannak caah mipi hriamtlai phu, hawikomh phu hna i i bawm in raltuknak i ruang tein SAC kan doh lai tiah nan ṭialmi hmuh a si. Mah kong fiang deuhin na kan chim kho hnga maw?

Salai Htet Ni – Cathanh ah kan rak telh bantuk in Chinland sersiam ṭhannak timi cu hrang SAC nih hramhram in uknak a lak ruangah Chin miphun hna zeihmanh taang loin rawh cikcek a si. A cheu cu raltuknak ruangah inn le lo rawh dih a si.

Mah pawl sersiam ṭhan, hmunhma sersiam ṭhan hna hi raltuknak lei ah himnak a um hmasa a hau. Himnak caah raltuknak kan tuah hi a si. Himnak ca le hramhram uktu pawl hrawh cikcek a si tiang hawikomh phu hna, mipi hriamtlai phu hna he rak kan tuk hi a si.

Kum 34 tlinnak Chin Miphun Dothlennak Ni ah hawikomh phu hna he i fonh in raltuknak fak deuh in tuah ding kha 34 tlinnak cathanh i a muru cu a si.

Khonumthung Burmese – Chinland kan sersiam ṭhan lai, uknak lei, himnak le phungning tein kal khawhnak pawl cu dot khat hnu dot khat in kan sersiam lai tiah cathanh chungah telh chih a si. Mah kong hi tah na kan fianh deuh kho lai maw?

Salai Htet Ni – Chinram ah a khuakhua in, a pengpeng in uknak mah tein i sersiam cangmi a um. CNF he i bawm in sersiam ṭhannak, lam ding serpiaknak, a tlumi thawh ṭhan timi hna i kan i ruahchanmi a si. Committee Representing Pyidaungsu Hluttaw (CRPH) in a rak dirmi mipi uknak, himnak pawl cu kan hawikom phu hna le Interim Chin National Consultative Council (ICNCC) hna an um ko. Kapkhat lei ah NUG zong a um ko. Mah pawl hna sersiam ṭhan, a ngaingai ti ahcun hramhram in uknak lak a si hnu ah zeihmanh a taang lomi mipi nunning kha mah tein a si khawhnak bik in sersiam ṭhan timi ruahchannak in atu kan cawlcangh hi a si.

Khonumthung Burmese – A tulio Chinram i raltuknak lei cawlcanghnak le dothlennak ralkap pawl i an dirhmun tah zeizah a lawh?

Salai Htet Ni – Atulio ahcun, mipi hriamtlai phu, a hlei in CDF he i tlai in Chinland Joint Defense Committee (CJDC) tiah dirh a si. Anmah le kanmah fonh in raltuknak lei cawlcanghnak kan ngeiṭi. Kahdohnak hi cu Chin ramkulh peng 9 chungah a cang. Asinain, ralhrang SAC ralkap pawl nih khua pakhat le pakhat pehtlaihnak lam cungah kahdohnak a chuak. Khuate lei hna zong luh an i zuam peng. Kanmah nih kan doh hna. CJDC he i fonh in Chin ramkulh peng 9 ah kahdohnak kan tuah khawh. A biapi in khuate lei cu SAC nih a phan kho lo.

Khonumthung Burmese – A tulio Chinram ah SAC uknak dirhmun zeidah a lawh?

Salai Htet Ni – Kan chekhlai khawhmi cu Chin ramkulh ah SAC rianṭuannak hi khuapi chung lawng ah a um. Khuate lei cu zeiti hmanh in an tlai kho lo. Khuapi chung zongah SAC rianṭuannak, departments kip a dir dih kha hmuh khawh a si. Cucaah, SAC rianṭuannak a rawk dih tiah chim khawh a si.

Khonumthung Burmese – A dangdang chim na duhmi a um ti maw?

Salai Htet Ni – Mah hramhram in uknak lak hi caanṭha kan i lak lai i hramhram uknak kan hrawh lai. Kan duhmi Federal Democracy rampi ser khawhnak caah kan thisen kan thap hi a si. Cucaah, kan thi reu cikcek in tuah ding cu zapi i tel in kan doh lawng ah a ngah ding mi dirhmun a si. Atu caan hi ramkhel lei caan chia bik lam donghnak kan phak a si. Mipi hna nih lungdong loin a dongh tiang doṭi ding in kan sawm hna.

Biakilh: The Chinland Post nih a tlakning in  Khonumthung Burmese chung in leh mi a si. ~ Editor 

Na ruahning rak langhter ve.. (Leave a comment)

%d bloggers like this: