Ralkap Chung Ah Khawnh Lo In Bau Ahcun An Zaam Cang Tiah An Ruah Hna, Thla 2 Chung Ah Ralkap 100 Leng An Zaam
The Chinland Post | 2023 September 14 — SAC nih a ralbawi pawl tampi telh in ralkap pawl khawnh lo in an an bau ahcun an zaam tiah an ruah hna i SAC sin in a zaam mi lak ah Eastern Central Command tang ralkap pawl an tam bik tiah theih a si.
Khawnh lo in a bau i a zaam cang tiah ruah mi chung ah SAC Battalion Commander le Second Battalion Commander 20 leng an i tel i thla 2 chung ah khawnh lo in a bau i a zaam mi 128 an um tiah Ayeyarwaddy Times nih a langhter.
Eastern Central Command tang ah a um mi Battalion chung in ralbawi ngan pawl telh in Captain le an tang ralkap pawl cu Karenni ram le tlangcung hriamtlai hmunhma pawl ah an cang mi ralram kahdohnak pawl ah an kal duh lo caah an zaam hna tiah ralkap chung in thawng theih a si tiah an langhter.
“Ralram le kahdoh a tamnak hmunhma pawl ah a um mi Battalion pawl ah atu bantuk in khawnh hal lo in a um mi cu an zaam cang tiah an ruah/min an khumh hna. Eastern Central Command lei an tam khun. Ralkap chung an luhchuah dan kha cazin ṭha tein an ngeih caah an zaam. Ralkap chung hin sml 2 chung khawnh lo in um tlau ahcun an zaam tiah an ruah hna. CDM a tuah tiah an ruah hna” tiah Eastern Central Command he aa naihniam mi nih Ayeyarwaddy Times ah a chim.
SAC ralkap pawl nih Sagaing ramṭhen, Magway ramṭhen, Bago ramṭhen le tlangcung hriamtlai hmunhma hna ah thazang tampi hmang in kahdohnak an tuah.
Cubantuk in thazang an chap ko nain tlangcung hriamtlai hmunhma le khuate lei dothlennak phu pawl nih an kah lengmang hna caah SAC ralkap a thi mi an tam.
