Ralkap Nurse Si A Duhnak Chunmang Tlinhchuahnak Caah Kum 80 A Si Hnu In Sianginn A Kai Thanmi Tarnu
City Hunter| 2018 April 5| A ngakchiat lio ah sianginn thathi kai kho lo in aa phuakmi Salvacion Nanay Sally Flores Nacario timi kum 80 Philippine tarnu pakhat cu a chunmang ralkap zohkhenhtu nurse pakhat si a duhnak tlinhchuahnak ding ah a tar hnu pi ah sianginn a kai than.
Kum 80 a tling cangmi Philippine pitar hi fa 10 a ngei nain a fale 6 lawng an nung cang. A kum a upa tuk ko cang nain a chunmang saduhthah lam zulh ding in biakhiahnak aa tuah than. Hi ruang ah midang vialte zong chunmang saduhthah rianthawk le tlinternak ding ah kum ngakchiat le kum upat a um lo timi a hun hngalhter cio hna.
Kum 80 tarnu hi Philippine ram, Metro Manila, Makati khua ah a ummi Fort Bonifacio siangsangrun ah grade 11 (kumkhatnak) a kai cuahmah liopi a si. Tarnu hi a kumkhua a upat cang ruang ah thate in lam zong a kal kho tuk ti lo nain a zawhfah caan dah ti lo paoh cu sianginn kai a bau bal rih lo.
Hi tarnu hi siangsangrun a kumthumnak ah sianginn kai a rak i phuak i fa a ngeih tik zong ah sianginn kai kho lo in a fale zohkhenhnak le cawmnak ding ah a caan vialte a pek dih.
Asinain a fale an tlah dih hnu le chungkhar cio he khua an sak cio dih hnu ah atu bantuk in chunmang a rak manhmi a saduhthah tlinhchuahnak ding caah sianginn kai aa thawk than hi a si. Kum 60 tluk a hnu ko cang nain tarnu nih a chunmang manhmi saduhthah cu a thlah lo caah upatnak an pek i an thangthat cio tiah theih a si.
Credit: Buzzy, Buzz Myanmar
About The Author
