Ralkap Pakhat Lawng Chiahding Kahngolnak EAOs Phu Nih Kan Cohlan; Dr. Lian Hmun Sakhong
City Hunter | 2018 Tho 17| Ram Pumpi kahngolnak biahran NCA min a thutu tlangcung hriamtlai phu (EAOs) hna le ralkap (tat-ma-daw) karlak ah ihmuhthiam lonak pakhat a simi ralkap (tat-ma-daw) pakhat lawnglawng chiahding timi cu tlangcung hriamtlai phu EAOs leikap nih tlamtlingte in kan cohlan cang tiah CNF (Chin National Front) in Dr. Lian Hmung Sakhong nih a chim.
Naypyidaw ah tuahmi cozah, ralkap le NCA min a thutu tlangcung hriamtlai phu hna telh in kapthum hruaitu lutlai hna ton biaruahnak a nihnihnak adih hnu ah atu bantuk in a chim hi a si.
“Pakhat te lawnglawng a simi ralkap (tat-ma-daw) kongkau cu kanmah tlangcung hriamtlai phu leikap nih rampi pakhat ah ralkap pakhat lawng a um lai timi cu kannih nih tlamtlingte in kan cohlan. Cun, ralkap (tat-ma-daw) hi zeibantuk ralkap dah an si lai, zeibantuk muisam in dah ser an si lai timi cu pehzulh in kan i ceihmai rih lai. Ralkap (tat-ma-daw) pakhat lawng timi phunghrampi, a riantuan ningcang kong pehzulh ceihmai rih ding in kaphnih hnatlaknak kan ngei cang” tiah Dr. Lian Hmung Sakhong nih a chim.
Ton biaruahnak a dih hnu cathanh zong ah, “NCA No.5, ramkhel road map chiahnak dal 20 (c)nak i aa telmi runvennak kongkau fonhtonhnak kongkau, rian lamthluan pawl ceihmainak thawk ding” tiah October 16 zanlei ah an thanhchuah.
Ton biaruahnak ah harnak an tongmi ramkomh in thenchuahlonak, federal le ralkap (tat-ma-daw) pakhat lawng chiah ding timi a biapimi kongkau pawl ceihmainak an ngei. Cu pin ah EAOs leikap in kahngolnak min a thu rih lomi phu hna he ton biaruahnak ngeih ding timhtuahnak an ngei tiah theih a si.
Cuti an i ton dih hnu ah November thla thih hlan ah atu bantuk ram hruaitu bik lutlai hna ton biaruahnak an tuah than lai i an ceihmai dih rih lomi ceihmainak an tuah lai ti zong theih a si.
Cu bantuk in ralkap bawizik senior general Min Aung Hlaing zong nih, “ramkulh, ramthen hoih in upadi he aa tlak in a cohlanmi federal, self determination pawl hmuh ahcun hriamtlaih lamthluan hi thlah le ngol a hau” tiah October 15 ton biaruahnak biahuncah ah a chim.
NCA kahngolnak min a thu rih lomi tlangcung hriamtlai phu zapi an i tel khawhnak ding pehzulh in i zuam rih ding tiah hruaitu lutlai hna hnatlaknak kan ngei tiah cathanh ah an telhchih. Cu pin ah miphun rualremnak le mahte khuakhan lairelnak caah tlamtlingte in aa-mah-khan a ummi democracy le federal phung in hram a bunhmi ramkomh si ding hi ramkhel biaruhanak phichuak he aa tlak in kan ser lai timi zong aa telhchih.
Ref: Mizzima, RFA
About The Author
