Ralkap phih ruang ah Ann peng ah Chin mi 10,000 leng eidin awk an ngei lo: CHRO

0

Ann Khuapi (Ann Town) Photo: NMG

By Salai Tluangkipthang — Rakhine ramkulh, Ann peng i Daletchaung khua le a kiangkap ummi khua 42 cu Ralkap nih tlunkalnak lam an phih caah eidin awk facang an ngei lo tiah Chin Human Rights Organization (CHRO) nih June 22 ah cathanh an chuah.
CHRO cathanh an langhter ning ah, “Ralkap nih a biapi ah hmanmi tlunkalnak lam, Tilam siseh, tlanglam siseh a kham ruang ah Daletchaung khuakomh (Ohsuh) ummi Khua 42 in minung 12,139 nih eidin awk an ngei ti lo. An khamnak hi January khan a si cang, nain a hun fah hnu June 17 hnu hin tlunkal biatak tein an phih caah eidin an har” tiah theih a si.

“Ann khuapi in Daletchaung le Shan Kone khua lei kalnak Tlanglam siseh, Kantaungkyi in kalnak Tilam siseh Ralkap nih an kham caah June 17 thawk in cu kiangkap ah a ummi hna cu facang eidin awk an ngeiti lo caah atuhi a rannak in facang bawmhnak pek an hau” tiah CHRO Field Director Salai Terah a chim.

Daletchuang khuakomh (ohsuh) ah kiangkap ah atu lio rawlei din awk ah a harsami khua 42 chung ahhin, khua 37 hi Lai (Chin) mi umnak khua a si. A dang khua 5 telawng hi Rakhine khua a si. cun, a tu ah facang eiding an ngei tilo caah banhla le thei dangdang eiding cang tiah theih a si.

Ralkap nih tlunkalnak an phihnak a ruang cu khuami tlunkal lio ah AA nih an duhherh an i zalh ve sual lai. AA sin ah facang a phan sual lai timi an phan caah a si. Cun, Khuami chimnak ah Daletchuang le Shan Kone khua hrawnghrang ah Ralkap umhmun an khuar i kahdohnak (Clearance Operation) an tuah cuahmah lio zong a si tiah CHRO in Salai Terah nih cun a chim.

Khuami nih an harsatnak kong he pehtlai in Ralkap an chimh hna tik ah, a zawmi le cozah riantuantu cu chawhleh a ngah ko. Cun, nanmah caah bawmhnak kong hi a cunglei ah kan chim ko lai. Nain, hika hmun ah bawmhnak tirawl a phanh dingmi kong he felfai tein zohfel le tlangtlak a hau lai tiah Ralkap nih khua mi cu an ti hna tiah theih a si.

Atulio ah, Ralkap cawlcanghnak a fawi deuh nakhnga ding caah Khuate cu an fonh cuahmah fawn hna caah Daletchaung le Shan Kone khua cu an i fonh cang tiah kan theih. 

Ralkap le AA an i kahnak hmun hna lak ah Chin ramkulh in Paletwa le Rakhine ramkulh in Ann, Myebon, Minbya tbk. khuapi hi Chin miphun khua saknak a si. #

About The Author

Na ruahning rak langhter ve.. (Leave a comment)

%d bloggers like this: