Ralkap Phu Nih Sualnak Ngei Lo Mipi 4,170 Leng An Thah Cang Hna
The Chinland Post | 2023 November 8 — Myanmar ram ah hramhram in uknak lak a si hnu kum 2 le cheu leng caan chung ah SAC ralkap nih sualnak ngei lo minung 4,175 leng an thah cang hna i a tlaih/hren mi minung 25,382 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 November 7 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter.
Pau Dothlennak chung, tuni tiang ah minung 19,656 an tlaih/hren cang hna i cu chung ah minung 8,020 cu thongthlak ding in biakhiah an si.
Dothlennak he pehtlai in an tlaih/hren hna i thah ding tiah biakhiah a tong mi 120 an um i hriawh in thah ding tiah biakkhiah a si mi 43 telh in minung 119 cu hriawh in thah ding tiah biakhiah an si caah thah ding tiah biakhiah a si mi an zapi te 163 an um cang.
Atutiang ah biakamnak he an thlah ṭhan cang mi hna 5,626 an um tiah a langhter.
AAPP cazin ning ah, 2023 November 1-7 tiang ralkap phu ruang ah nu 8 le pa 5 tiah an zapi 13 an thi cang i hriamngan ruang ah a thi mi 10 an i tel.
Cun zarhkhat chung ah nu 2 le pa 8 tiah an zapi 10 cu ralkap phu nih an tlaih hna i baceih zung ah ningcang lo in sual an phawt hna i nu 2 cu an hren cang hna tiah AAPP nih a langhter.
