Ralkap Sawmnak VP Henry Van Thio nih A Cohlang Lo: Pu Terrance Sanmawi Nikhuai le Pu Sonny Thang Cung Dirhmun
Editorial – 2020 February 4|: Ralkap nih nawlngeihnak an lak hnu nili chung ah an si khawh chung in zapi zaran mipi chung in sawmnak an tuah cuahmah. Rampi uknak Council tiah State Administrative Council tiin Ralkap min Kawlram uktu min a sak. Hi Council chung ah ralkap a si lo mi zong an hun i tel thluahmah hna; Karen le Rakhine miphun in an i tel mi zong hmuh khawh a si. Nain, Vice President Henry Van Thio cu Ralkap nih an sawm lengmang nain a cohlang duh hna lo tiah a naihniam sin in theih a si.
A naihniam pakhat nih, Pu Henry Van Thio cu Ralkap nih an sawm ko. Asinain, cohlan lo ding ah anmah pumpak siseh, a dangdang nih an hun chimrel cio bang Ralkap lemsoinak cu a cohlang lo tiah a chim.
Atutan ah, Chin ramkulh ah Ralkap nih cozah uktu an pek mi hna chung ah Laimi chung in rinhchan mi hun thim an si. Atu ah min a lang cang mi cu Chin State Biaceihnak Zung ah biaceihtu upa pakhat a si mi Terrance Sanmawi Nikhuai cu Chairman caah thiah a si. A dang pakhat bia chawkvak a leng mi cu tutan thimnak ah teinak a hmumi Pu Sonny Thang Cung zong Ralkap nih an sawm tiah theih a si. Cun, Mindat lei in Pu Vomthu Maung fapa Pu Maung Ha zong an sawm i ramkomh Council chungtel ah an telh. The Chinland Post Editor nih biaruahnak a tuah hi thil sining fiang in kan vun thanh lai. Hihi kong ah Vice President Henry Van Thio bantuk bang Pu Terrance le Pu Sonny Thang Cung le a dangdang an sawm lai ding mi nih hin al hna sehlaw cucu a hlawhtling taktak mi a si hnga. Cucu, mipi nih nawl al timi (Civil Disobedience Movement) hrampi thawknak ah a fekfuan mi hramthlaknak a si.
Atulio ah, zapi zaran nih mipi nawlngaihlo cawlcanghnak (Civil Disobedience Movement) an tuah cuahmah mi ah a kal bik ding le hlawhtling kho bik ding mi cu Civil Servant (mipi caah riantuanmi nawlngeitu upa) nih an thawk ding mi a si. Cucun, Nawlngeitu riantuan mi upa lawng silo in, zapi zaran mipi hrimhrim nih tuah ding mi rian tampi a um. Atu ah, mipi caah riantuan mi chung in ngandamnak zung lei in Sibawi te an rian an i dinh mi kan theih. Nain, anmah in cun hlawhtlin a har lai dah!
Cucaah, amah sibawi telawng rinh si loin zapi nih dirpinak an herh hringhran. Hmunkhat ah cawlcanghtinak a um a herh. Cucu kan tuah khawh mi cu Chawdawr zuar mi nih siseh, rawldawr zuarmi hna nih siseh, nicheu chung dawr kharnak tbk. kan tuah khawh mi a si. Zapi nih ralkap uknak hi kan duh hrimhrim ti lo timi hi a langh khawh a herh. Ralkap nih an kan duh ti lo timi hi kan chim i, kan rel lo ahcun, an theih ko zong ah an i theihter lai lo.
Ramkomh Kawlram ah, Chin ramkulh a hmete a si ko a vawlei umtuning le milurel in kan tlawm ko. Asinain, kan thil tuahnak a tha mi le cawlcanghnak a tha mi nih rampi tiang a phanhter khawh ko. Thil thalo dohtu miphun sinak in kan miphun limhang kan cawisan khawh. Cucu, cozah upa sawm mi nih alnak in an thawk khawh bantuk in, mizapi nih duhlonak langhter ningcang thlen in kanmah mipi sin hrimhrim in aa thawk i hram a bunh ahcun, kan tlawm kan tam ah si lo in, thiltha tuah mi nih zohchun awktlak le hlawhltinnak lam a chuahter khawh ko lai.
Milurel tlawmte le ramkulh fate si ko hmanh sihlaw, ruahnak tha le cawlcanghnak tha he kan i lungrual ahcun hlawhtlinnak a chuahpi khawh ko dah fawh!
Kan Miphun Nih Ralkap Uknak Cohlang Hlah Seh!
Kan Miphun Nih Ramkap Uknak Doh Seh!
Ralkap Uknak Donghternak Ah Kan Miphun Hmaihnor Ve Seh!
About The Author
