Ralkap Vanlawng Kahnak in Paletwa ah Minung (7) An Thi, Minung (8) Hliamhma Tuar

The Chinland Post-Hakha| 2020 April 8| Chin ramkulh Paletwa peng ah Kawl Ralkap le Arakan Army (AA) cu April (7) ah kahdohnak a cang I Ralkap lei nih Vanlawng in Bom an thlak, an kah ruangah Nanchawng khuami minung (7) an thi I minung (8) hriamhma an tuar tiah theih a si.

“Minung (7) hi a hmun ah an thi colh. Minung (8) hi hriamhma an tuar, inn le lo zong mei nih a kangh a rawk ngaingai. Zualhma deuh in hriamhma a tuarmi minung (2) hi nizan Paletwa siizung an rak phanpi. Paletwa-Sami in Matupi siizung ah zeitin dah kan kalpi hna lai timi kan iceih cuahmah lio a si” tiah Amyotha Hluttaw palai Salai Myo Thait nih a chim.

Paletwa-Kyuattaw lam chung a ummi Nangchaungwa khua zongah April (7) zanlei 3-5pm karlak ah Helicopter in a kah rih caah inn (7) le facang rialnak seh mei a kang tiah theih a si. March 31 ni zongah Ralkap lei nih Vanlawng kahnak in Paletwa peng Bawnwa khua ah inn (13) akang i minung (2) zong hliamhma an tuar tiah theih a si. Paletwa pengah AA le Ralkap kahnak hi a fak chin lengmang caah hi bantuk in Ralkap lei nih vanlawng hmang in an kah lengmang hi a si.

Aluanciami March 14-15 ni zongah Ralkap lei vanlawng kahnak in Mitsawa, Wehmah, Piangtin khua hna ah inntek minung (21) an thi cang.

Atu Bomb an thlaknak Nangchaungwa khua hi Inn (40) a ummi a si I Paletwa ah meng (10) aa hlatnak ah a ummi a si.

Ref: Khonumtung

Na ruahning rak langhter ve.. (Leave a comment)

%d bloggers like this: