Ralkap Vanlei Kahdohnak Ruang Ah Paletw Ah Hngakchia Telh In Mipi 4 An Thi
The Chinland Post | 2024 January 18 — Chin ramkulh, Paletwa peng, Kyi-lay khua ah ralkap nih vanlawng in bom a thlak caah hngakchia telh in khuami 4 an thi tiah theih a si.
January 15 chun sml 2:00pm hrawng ah ralkap lei nih Jet kahdohnak vanlawng in Kyi-lay khua pawng ah bom a thlak hi a si i hngakchia telh in mipi 4 an thi, 3 an i hliam tiah khuami nih Khonumthung Burmese ah an chim.
“Kyi-lay hi Kaldan tiva pawng ah a um mi a si caah tilawng in a umkal mi an um tawn. Cuka hmun pawng ah vanlawng nih bom a thlak caah mipi 4 an thi. Paletwa peng khua cheukhat zong atu bantuk in bom an thlak. Khuakhat lawng siloin dothlennak phu pawl an um lai tiah a ruahdamhnak poah cu a thlak” tiah a chim.
A thi mi hna hi Pa Myat Thu Aung (kum 5), Pu Maung Kyan (kum 49), Pu Maung Phyu (kum 67), Pu Zaw Zaw Lwin (kum 36) hna an si tiah Paletwa hrambunh Kimo Media nih a langhter.
Kyi-lay khua ah kahdohnak um lo pi in ralkap nih vanlawng in bom an thlak hi a si.
Kyi-lay khua hi Paletwa chaklei meng 10 aa hlatnak ah a um mi a si.
