Ralzaam bawmhnak caah Rupees sing 400 leng kan hman cang tiah Mizoram cozah nih a chim
The Chinland Post | 2023 February 20 — Myanmar le Bangladesh ram in a rak i dor mi ralzaam hna caah bawmhnak Rupees sing 400 leng kan hman cang tiah Mizoram Minister of Home Affairs Pu Lalchamliana nih a chim.
Mizoram ah an tuah mi Assembly Budget Session Hluttaw meeting ah Mizoram chung ralzaam hna dirhmun he pehtlai in biahalnak ah a chim mi a si.
Mizoram cozah cazin ning ah 2023 January 27 tiang Mizoram chung ah aa dor mi ralzaam 31,508 a um mi chung in 31,050 cu Myanmar ram in aa rak dor mi an si i 458 hi Bangladesh in aa rak dor mi an si tiah Minister of Home Affair nih a chim.
Myanmar ram in aa rak dor mi ralzaam pawl bawmhnak caah Rupees sing 384 leng kan hman cang i Bangladesh ralzaam hna caah Rupees sing 30 tiah a zapi sing 414 leng kan hman cang tiah Pu Lalchamliana nih a chim.
Ralzaam pawl caan a biapi in kan hman mi pawl hi i dornak buk saknak, mei phawtzamhnak, ti phawtzamhnak, sii, eidin le adang a herh mi cawknak ah a biapi in kan hman tiah a chim fawn.
Chin atlang phu le nuhrin covo phu hna nih cun Mizoram ah a phan mi Myanmar ralzaam 50,000 deng an si tiah an ruahdamh.
About The Author
