Ralzaam Bawmhnak Pek Dingah Hakha Mino Paletwa Peng Sami Ah An Kal

TCP Hakha| April 9, 2020- Chin ramkulh Paletwa peng ah Arakan Army timi Rakhine hriamtlai le Cozah ralkap ikahnak ruangah inn le lo chuahtak in a zaammi harsa pawl bawmhnak caah Hakha khuachung bawmhhal mi le ramleng lei in kustmi bawmhnak pawl pek dingah Hakha mino cu April 9, 2020 ah Hakha in an ithawh i dam tein Matupi an phan. April 10 ah Paletwa peng Sami ummi ralzaam pawl umnak ah kal ding timhtuahnak an ngei tiah kan theih.

Hi kongah tlangtlatu ah aa telmi Salai Tluang Te nie “hi bawmhnak hi March 22, 2020 khan tlawmkholh kan thawk i nizan (April 8) tiangah khan tangka sing 210, thilpuan sala-aih dip 8 a chuak. Cun Thailand pher zun 350 kan cawk i a tangka fang in sing 70 hi Sami ralzaam riahbuk ummi pawl caah kan tawhkhah. Paletwa I ummi ralzaam pawl caah sing 30 le Rakhine ramkulh Minpia pengah a ummi Chinmi ralzaam minung 6185 hna caah a tangmi paoh pek ding timhtuahnak kan ngei” tiah The Chinland Post ah a chim.

Sami IDPs Camp
Photo- Salai Mang Ghung

Bawmhnak hi a tlangpi in Hakha khuachungah kholh a si i cu leengah US le Norway ram ummi Chinmi sin in siseh Kalay ummi sin zongin bawmhnak zeimawzat a lut tiah kan theih. Cun bawmhnak pek ah a kalmi Mino pawl Hakha in an ithawh hnu zongah bawmhnak tete a lutmi a um chap. A ruang cu Rakhine ramkulh ummi chin ralzaam pawl ca kha kuat a si rih lo caah bawmhnak pek kha kham a si rih lo tiah tawlreltu upa sin in theih a si.

Paletwa peng i AA le Kawl ralkap ikahnak hi tuhlannak zongin a ceizual deuh kho tiah ruahdamhtu zong an um I nizan naite zongah Paletwa khuachung bak ah an caah minung tamlak te an thi i ralzaaam zong tuhlan nak in tam chin lengmang dawn in a um.

Na ruahning rak langhter ve.. (Leave a comment)

%d bloggers like this: