Ralzaam Duhning In Zeihmah Lehnak Um Rih Lo Tiah Chin Ralzaam Lutlai Nih A Chim
Salai Cung Cung |2019 January 21| India ram New Delhi um Chin ralzaam nih UNHCR biachahmi nithum chung New Delhi UN zung ah duhlonak langhtermi cu UN lei in zeihmanh bialehnak a um rih lo tiah Chin ralzaam lutlai pakhat nih a chim.
“Tuan deuh ah kan rak chim bal cang, atu hi avoithumnak tiang duhlonak kan langhter mi chung ah zeihmanh bialehnak a um rih lo tiah Chin Refugee Committee Chairman Remmawi nih a chim.
“Tubantuk duhlonak kan langhter mi chung ah teinak kan hmu lai maw ti cu a fiang rih lo. Kan duhnak kan halmi pawl cu nizan ah UN sin kan pek hna. Anmah lei zong nih kan i ceih lio a si e tiah thawng kan theih. Tu lio kan sining in cun zeihmanh chim ding kan ngei rih lo. Zeihmanh bialehnak a um rih lo caah tubantuk in New Delhi UN zung hmai in kan hngah ko hna” tiah a chim chap.
Tu bantuk in Chin ralzaam nih duhnak an halmi UN lei nih nihin tiang zeihmanh bialehnak a um lo caah a ralaimi zarh ah pehzulh in duhlonak langhter ding January 19 in 20 ah upa pawl tonpumhnak an ngei than lai i cu tonpumhnak biakhiah ning in mizapi thawng thanh an si than lai tiah kan theih.
Hi kong he pehtlai in Chin ralzaam lei in halmi UN lei nih bialehnak a um hlan lo, duhlonak an langhter peng rih ko lai tiah New Delhi um Chin Human Right Organization_ CHRO zung riantuantu Salai Cung Dawt nih a chim.
“Tubantuk duhlonak an langhtermi hi san a tlai lai maw tlai lo ti cu chim khawh a si rih lo. Zeicatiah atu duhlonak an langhter mi hi voidang bantuk si lo in thlithup in a si i UN lei zong nih tlawmpal cu an ruah ve ko men lai ti ka zumh. Voikhat lawng duhlonak langhter mi a si lo caah kanmah lei zong nih bialehnak um hlan lo pehzulh ding in timh tuahnak kan ngei. Zarhteni asilole zarhpi ni tibantuk ah tonpumhnak kan ngei than lai i zeitindah kan cawlcangh lai timi tonbiaruahnak kan ngei lai” tiah a biapeh ah a chim.
India ram um Chin ralzaam minung 400 leng nih UNHCR biakhiahmi cu January 16 in 18 tiang UN zung hmai ah duhlonak an langhter tiah kan theih.
Ref: Khonumthung
About The Author
