Ralzaam hna karlak ah Covid sinning in a zawmi an tam
The Chinland Post | 2022 September 28 – Shan le Kayah ram kahdohnak chung in himnak ah a zaam mi pawl hna karlak ah Covid zawtnak tiah ruahmi in a zawtnak a tuar i an khuh hna tiah ralzaam a bawmtu le ngandamnak a zohkhenhtu pawl nih VOA ah an chim.
A zaw mi hna Covid an si le si lo kan check khawh hna lo leng ah sii zong nih a kan zat lo tiah an chim.
Kahdohnak ruangah himnak hmun a zaam mi Shan le Kayah ramri Pekon peng khuami hna karlak ah Covid tiah ruahmi zawtnak in an zaw hna tiah Nurse pakhat nih VOA ah a chim.
Pekon ni chuahlei ah a dormi khuami 1,000 leng an um i cheuthum cheuhnih cu an zaw hna tiah an ruahdamh.
Ralzaam hna karlah ah a zaw mi an tam i sii a zatawk in a um lo caah a zaw mi hna hi Covid an si le si lo check khawh a si lo i hmailei ahcun thinphang a si tiah Nurse nih cun a chim.
Ralzaam hna cu himnak ah chikhat zaam a si caah a bubu in an um hna i pakhat le pakhat i hlat tein umter awk zong a ṭha lo. Pakhat a zawt ahcun an zapi tein an zaw dih ko tiah a chim.
Cu bantuk in Karenni ram, Demoso peng zong ah ralzaam hna cu Covid tiah ruahmi zawtnak in an zaw cio hna tiah ralzaam bawmtu phu nih an chim.
Ramchung ralzaam hna cu an zaamnak caan a sau bantuk in harnak a phunphun an tong i bawmtu zong an um ti lo ti awk in an zor thluahmah tiah ralzaam zohkhenhtu phu nih an chim.
About The Author
