Ralzaam Hna Umnak Caah Daw Khin Kyi Foundation Nih Umnak Inn 50 Tikir Khua Ah A Sak Piak Hna

0

Daw Khin Kyi Foundation nih Tikir khua ah Ralzam hna ca sakmi/ Tikir Khuami

Salai CungCung|2020| January 16| Thantlang peng Tikir um ralzaam hna caah Daw Khin kyi Foundation nih umnak inn 50 a sak piak hna tiah kan theih.

Chin ramkulh Paletwa peng chung ah Kawl ralkap le AA kar kahdohnak  a chuak ruang ah mah le umnak inn kal tak in Thantlang peng Tikir khua ah ralzaam dirhmun in a um mi hna umnak inn caah (24 pee x 24 pee x 10 pee)  inn 50 kan sak piak hna tiah Daw Khin Kyi Foundation Director U Moe Zaw Oo nih a chim.

“Ralzaam pawl an chungkhat a rak i thial rih ding mi an um hna tiah kan theih. Chin ram cozah nih a rak i thial ding mi hna caah inn 50 hrawng sak piak ding bawmh a kan hal tik ah kan mah zong nih kan va zohfel hnu ah inn 50 kan sak piak hna hi a si. A rannak in thialkam a duh mi hna an um sual ah tiin kan sak piak hna hi a si” tiah U Moe Zaw Oo nih a chim.

November 15 ah Paletwa peng Miza khua in ralzaam Bawm miphun inn dong 20 (minung 100) cu cozah tawlrelnak in Thantlang peng Tikir khua ah an rak i thial hna. Cun rak i thial a duh rih mi hna caah tiin tubantuk in inn an sak piak hna hi a si tiah kan theih.

Hi inn sak hram cu kan hnu thla December 15 in an rak thawk i 60 % hrawng a dih cang tiah kan theih. Umnak inn 50 caah hin inn khat cio ah 65 % in a zapi Sing 3000 leng  timh tuahnak an ngei I March thla dih lei ah ralzaam rak i thial khawh ding timh tuahnak an ngei tiah Daw Khin Kyi Foundation Director nih a chim.

Tulio Tikir khua ah ummi ralzaam hna le a rak thial rih ding mi ralzaam hna an paw cawnnak ei ding awk rian an tuan khawhnak ding caah ramkulh cozah nih an tawlrel piak hna tiah Social minister U Puai Lun Min Thang nih a chim. Daw Khin Kyi Foundation nih inn 50 caah electric mei Solar hmuh khawhnak ding in bawmhnak a pek rih hna tiah U Moe Zaw Oo nih a chim.

Daw Khin Kyi Foundation nih kan hnu kum Chin ramkulh Tonzam peng Hakhalay khua kokek ral ruang ah inn le lo a rawk mi pawl caah bawmhnak a rak pe bal hna tiah kan theih. Ref. Khonumthung

 

About The Author

Na ruahning rak langhter ve.. (Leave a comment)

%d bloggers like this: