Ralzaam 860,000 an lonh tiah UN OCHA nih a chim
The Chinland Post | August 2 – Hramhram in uknak lak a si hnu kumkhat le cheu leng caan chungah ralzaam 860,000 an luan cang tiah United Nations Officer for the Coordination of Humanitarian Affairs (UN OCHA) nih July 31 ah a thanh.
Ralzaam 866,400 chungah Sagaing ramṭhen ah 470,000 in a tambik an um i Karen ram ah 82,400 in a pahnihnak a tambik an si.
UN OCHA cazin ning ahcun Magway ramṭhen ah ralzaam 79,200 an um i Kayah ram ah ralzaam 74,500 an um.
A taangmi ralzaam hna hi Karen ram, Kachin ram, thlanglei le chaklei Shan, ni chuahlei Bago, Taninthary ramṭhen le Mon ram hna in an si tiah UN OCHA nih a langhter.
Hramhram in uknak lak a si hlan le uknak lak a si hnu ralzaam zapi sing 12 an lonh caah bawmhnak an herh tuk bantukin atutiang ah 13%, USD $ 106 million lawng bawmh khawh an si rih tiah UN OCHA nih a thanh.
Cun, hramhram in uknak lak a si hnu ah minung 1.6 million rian ngei loin an um i tangka 18% tiang a karh tiah World Bank thanhmi charhchan in UN OCHA nih a thanh chin.
