Ralzam Kir Thannak Kong Ah UNHCR Nih Hakha Hrambunh Zatlang Bu le NGOs Tonnak A Tuah
Credit: Times of Chinland June 28, 2018
The Chinland Post| 2019 May 14 | United Nations High Commissioner for Refugee (UNHCR) Hakha hrambunh nih UNHCEF zung, 2019 May 13, Hakha ah a ummi zatlang bu (CSO/CBOs) cheukhat le cozah asilomi bu NGOs pawl he tonnak a tuah tiah kan theih.
Hi kong he pehtlai in, UNHCR lei ah tuanvo ngeitu simi pakhat nih, “Chin miphun chung in ralzam sinak in Malaysia le hmun dang ah a ummi pawl hi kir than a duhmi an um hnga maw? Kir thannak kong ah zeitindah kan tawlrel ah a that hnga timi ruahnak he meeting kan auhnak hi a si. Kir a duhmi an um taktak ahcun himte le felfaite in an kir i hika ah siarem deuh te in khua an sak khawhnak ding tlangtlakpi (facilitate) kan duh hna caah a si” tiah The Chinland Post ah a chim.
Meeting ah aa tel vemi CHRO in tuanvo ngeitu Salai Van Biak Thang nih, “A si, ralzam kir a duhmi an um taktak hnga maw? Cu a duhmi hna hi zeitindah kan tawlrel in kan bawmhchanh hna awk a si lai timi UNHCR nih ruahnak halnak a kan ngeih. Kan ram kong ah Hakha peng lawng zoh awk a tha lo, Paletwa peng zong ah zohchih a hau. Pengkhat le pengkhat kan dirhmun aa khat cio lai lo. Felfaite le nun himte in an kir i ramchung ah daite in khua an sak khawhnak ding ah cozah nih a fekmi policy an ngeih hmasa le cu an policy cu mizapi sin ah langhter hmasa a hau. Policy ngaingai a si khawh colh lo zong ah President nawlchuahnak in a fekmi phung ser le thanhchuah piak hmasa a herh. Cuti cozah lei nih a tuah lo ahcun kir ngam awk a si hnga lo” tiah The Chinland Post ah a chim.
Ralzaam kirternak kong he pehtlai in, UNHCR nih 2018 June thla ah Chin miphun cu humhimnak peklo in 2019 December dih hlan ah kirnak kong tawlrel ding timi phung an rak sermi a um. Asinain, Chin miphun bochanmi upa le ramleng in Chin mipun dawtu ramleng miphun dang tandirpinak thawng in UNHCR nih kum 1 a tlin hlan ah March 14 ah an phung cu an remh thanmi a si.
The Chinland Post nih hi kong ah a theihngalmi kan pehtlaih hna tikah, UNHCR nih an phung an let ko nain ralzaam caah thatnak a um hnga maw timi ruahchannak he, cun kir a duhmi hna caah kir thannak lam kan on ding a si timi hi an chim zungzalmi a si. Chin miphun zapi, a bik in, Malaysia, Delhi tbk. ah a ummi hi ram thumnak ah an lan kho dih lai lo. Zapi in kal dih ding hi cu a fawilomi a si tiah UNHCR nih an chim lengmang mi a si ti in, UNHCR cawlcangh ning le ramthumnak umkal ning kong a theihngalmi pakhat nih a chim.
Hi kong ah min langhter duhlomi pakhat nih, Hakha ah hrambunh in riantuanmi NGOs/CBOs pawl hi zeitindah ralzam kong kir thannak phung umtuning a si, zeitindah ramdang ah an tawlrel tawn, zeitindah a si awk a si timi a hngalmi kan tlawm tuk. UNHCR Hakha hrambunh i a ummi phu sin lawng ah ruahnak lak (consultation) a tuah i, biakhiahnak a tuah sual ahcun a poi ngai lai tiah The Chinland Post ah a chim.
Hi meeting chung ah, UNHCR le cozah nih phungphai tha tein an ser hmasa a hau. Vawlei cung zulhphung an zulh a hau tiah a chimmi zong an um lio ah, a kirmi pei an um thluahmah ko hi tiah a chimmi an um ve tiah theih a si.
Tutan UNHCR Hakha nih ton biaruahnak (meeting) an ngeihnak ah a kai kho mi hi Hakha hrambunh CSOs/CBOs le NGOs chung in an si. UNHCR nih 2019 March 14 an phung remh thannak thawng an thanmi ah Chin miphun ralzam hi 18,000 lengkai an si. A tam bik hi Malaysia ah an um i, a dang hi Delhi, Thailand le Nepal zong ah tlawmte an um tiah a langhter. Nain, Malaysia thawngthanhtu le a dangdang nih cun, Chin ralzam hi a tlawm bik 35,000 tluk hi Malaysia ah an um. Cuchung ah, UNHCR card refugee sinak a ngeimi hi 15,000 leng an si i, a dang 16,000 fai hi cu card zong a ngeilomi an si tiah an tial.
UNHCR nih a donghnak bik Chin miphun ralzam sinak ding caah a lam onh in minlaknak (registration) a tuah hi 2013 ah a si i, minung 23,000 tluk min an rak khumh hna tiah theih a si.
UNHCR nih Chin miphun ralzam caah phung an tuahmi an remh than cang
