Ram pumpi in khangh a tongmi inn 7,200 leng a si cang

The Chinland Post | 2022 March 19 – Myanmar ram ah hramhram in uknak laak a si hnu 2021 February 1 thok in March 15 tiang ah SAC ralkap nih khanghmi inn 7,248 hrawng a si cang tiah Data for Myanmar nih March 16 ah a thanh.

Sagaing ramṭhen ah inn 4,426, Magway ah inn 1,148, Chin ram ah inn 1,121, Shan ram ah in 93, Tanintharyi ah inn 29, nitlak lei Bago ah inn 24, Karen le Kachin ram ah inn 12 khanghpiak an si.

A luancia February thla ah inn 2,882 khanghpiak a si i kumkhat chungah inn khanghpiak a tambik thla a si. March thla chung, March 15 tiangah inn 1,121 tiang khanghpiak a si i tiah Data for Myanmar cathanhnak in hmuh khawh a si.

Inn khianghpiaknak hi hmunhma 201 ah a cang i a tling lomi cazin a si caah a taktak ah a kaangmi inn a tam deuh rih lai tiah an ṭial chih.

SAC in biachimnak nawl a ngeitu major-general Zaw Min Htun nih cun mipi inn a khangtu hi PDF phu hna an si tiah bialehnak a tuah.

Asinain, khanghpiak a tongmi mipi hna nih kan inn pawl hi SAC ralkap le pyusawhtee hna nih an khangh ko tiah an chim.

Na ruahning rak langhter ve.. (Leave a comment)

%d bloggers like this: