Ram Sernak Caah NLD Le Tlangcung Miphun Tinhmi Aa  Dannak Suttung

Salai Holy Tawk Tling Thang| Cabia (article) hi sau nawn in ka tial pah tawn. Asinain, carel huammi taktak lawng nih an rel. Zapi nihcun an rel zuam lo. Cucaah, tutan cu Rampi sernak caah NLD le tlangcung miphun hna tinhmi an i dannak  tawifiang te in tial kaa zuam.

NLD le amah a duh, a uartu nih an i tinhmi a sangbikmi cu “Myanmar rampi hi Democracy tahfung a tlingmi ramthar ser” hi a si. Hihi Kawl miphun caah a tha tuk nain, tlangcung miphun caah cun a tha dih lo.

Kawl a si lomi tlangcung miphun paoh nih kan duhmi le kan i tinhmi a sang bikmi cu, “Federal Democracy rampi ser” hi a si. Phundang in cun Federal hram a bunhmi Democracy ramthar ser hi a si. Hihi aa tlukruanmi ramsernak le covo a si caah Myanmar rammi dihlak caah a tha bikmi a si.

Ramkomh hluttaw ah 25% in ralkap nih thutdan 166 an laak cia cang. Hi zong hi thlenremh a haumi a si. Nain, hihi cu hei chia ta phut rih usih. Ramkomh hluttaw caah tlangcung miphun (ramkulh 7) thutdan zapi hi 207 lawng a si. Kawl miphun (region 7) thutdan zapi hi 291 tiang a si.

Hika zawn ah Democracy phungningte in mee thlak ahcun Kawl nih teicia zungzal kan si. Khikhi NLD asiloah Kawl party pawl nih an i duh tuk. Kawl pawl tamdeuh zong nih an duh, an uar tuk fawn. Chin mi tamdeuh zong nih a ruah awk kan hngalh  lo ca le (savo) kan i fian lo caah Chinram um Kawl party kha kan tlaihchan, kan uar tuk hnanak cu a si.

Cuti thutdan 291 le thutdan 207  in democracy phungningte in mee thlak ahcun Tlangcung miphun cu teicia zungzal kan si caah “Democracy hram a bunhmi si loin federal hram a bunhmi democracy in” tiah kan aupinak cu a si. Democracy hrambunhmi ahcun mi tamdeuh hnatlaknak in biakhiah zungzal a si. Federal hram a bunhmi democracy ram sernak ahcun “Tlukruannak” kha a suttung pi a si. Cu ruang ah “Kawl nih fangkhat an co ahcun, Chin zong nih fangkhat co ve” timi bia a rak chuah phahnak kha a si. Hihi Kawl huat le tlangcungmi tanh a si lo, Panglong hnatlaknak biahren “tlukruannak le aa khatmi covo” kha chim duhmi a si.

Cucaah, tlangcung mee 207 cu tlangcung miphun covo le savo bak a si caah tlangcung miphun nih kan laak awk hrimhrim a si ko. Kawl mi savo kha Kawlmi nih la ve ko hna seh. Cucu aa tlukruanmi kan covo cio kha a si.

Tlangcungmi hna nih hin ramkomh cozah le hluttaw thutdan sang ah hmunhma va laak le nawl va ngeih dih khi tinhmi sangbik a si lo. Tinhmi sang bik cu “Tlangcung miphun hna nih mah le ramkulh cio ah mahte in khuakhan lairelnak ngeih le mahte in i uk khi” a si.

Hihi, cozat a dotdot le NLD cozah tiang nih tha an pek lomi a si. Federal phunglam an i fiang lo i ramkomh in an chuak  lai ti tu an  phang. Federal he aa sengtlai bakmi pohmah 261 remh an duh lomi le amah party nih teinak a hmuhnak ramkulh le ramthen lila hmanh kha anmah duhmi Chief Minister thimnak nawl a pe duh hna lo. Cunglei nih a chakrengh aa fawih deuh dingmi hna kha “Cabawm” in Chief Minister le Hluttaw Speaker a thim hna.

Tlangcung miphun hna nih mah le ramkulh cio ah Chief Minister i thim khawhnak nawl le caantha ngei hna sehlaw, central party nih chakrengh le hramhram in thim a um lai lo. Anmahte in mee thlaknak, mi tamdeuh duhnak in an i thim ko lai. Hihi tlangcung miphun party cio nih an kalpimi le an policy cio zong a si. Hi pawl hi rampi le ramkulh sernak caah NLD le Tlangcung miphun party an i dannak suttung pi cu an si.

Salai Holy Tawk Tling Thang

2020 August 26

Note: Hi cabia cu catialtu pumpak hmuhning a si.