Ramchung ah Covid-19 i chawnhnak a karh ṭhan
The Chinland Post | 2022 September 9 – Myanmar ram ah Covid-19 zawtnak i chawnhnak cu a tulio caan ah a karh dan aa thei tuk i Laboratory sample a tam deuh chungah an hmuhmi cu ramchung i chawnhnak hi a tambik a si tiah SAC ngandamnak zung nih a thanh.
September 7 ah SAC ngandamnak zung nih a thanhnak ah Laboratory samples 9,808 an check i mizaw thar 223 an hmuh.
Mizaw thar 223 chungah 14 cu ramdang in a rak lutmi an si i a taangmi 209 cu ramchung in aa chawnhmi an si tiah a thanh.
August thla chungah mizaw thar an hmuhmi a tambik ni hi August 31 a si i mizaw thar 87 an hmuh hna. Cu chungah mizaw 14 cu ramdang in a raami an si i a tangmi 73 cu ramchung in aa chawnhmi an si tiah SAC cathanh ah hmuh khawh a si.
Myanmar ramchung September 7 tiangah Covid-19 mizaw 616,023 an um i a thimi 19,441 an um tiah a thanh.
SAC kuttang ngandamnak zung cathanh ning ah August 30 in September 6 tiang ramchung ah Covid-19 in a thimi 4 an um cang.
Atulio ah Covid-19 zawtnak a karh tuk ṭhan caah mipi hna nih leng kan chuah tikah a hlan bantuk in mask kan i huh ṭhan a herh cang i kan phaknak poah ah Hand Sanitizer in kan kut kan i ṭawl lengmang ṭhan a hau cang lai tiah Siibawi pakhat sin in theih a si.
About The Author
