Ramchung Chuak Zu Man A Kai Kho

TCP Hakha| 2020 January 30| 2019-2020 tangka kum ah Kawl Cozah nih 16% ngunkhuai man a kaih caah a zuarzamh tu hna caah hnorsuannak a um tuk lai lo nain a caw dingtu hna caah aman a kai kho tiah zu zuarzamh tu hna sin in kan theih.

Ngunkhuai kan pek tawnmi nak in 16% akai caah zu a chuahtu le a zuarzamhtu caah buainak a um lai lo nain ngunkhuai rup in aman akai lai. Ngunkhuai peklo in zuarzamhtu an umnak hna lo zong kan izuam lai tiah Myanmar Liquor Association Asst. Secretary U Win Thaw nih a chim.

Kawlram zu chuahtu pawl hi 2019-2020 caah Ks.200billion ngunkhuai an pek. Kumchiar 25%-30% kai in ngunkhuai hal an si tiah Ngunkhuai zung nih an chim.

Ramdang zu pawl hi ramri in phungninglo a luhtuk caah 2020 May thla cun luhpinak nawl onh ve dingin kan izuam cuahmah tiah Chawlet Chawhrawl Zuarzamhnak Vuanci zungin kan theih.

Ramdang zu ruangah ramchung zu zuarzamhnak a hnorsuan lai ti khawh cu a si lo. Phungning tein License an sok i a sokmi zat le phungninglo in a lutmi zong zoh in ngunkhuai hal ve an si ko lai tiah Win Thaw nih a chim.

Tulio phungninglo zu tamtuk a luh caah Cozah ngunkhuai tuak ning cheunga ah cheukhat lawng an hmuh tawn caah phungningin zuzuarmi caah a har ngai kho tiah theih a si. Ref: News Watch weekly Jan 28 +++