Ramkhel Party Upa Cheukhat Konglam Halmi Cu Ramkomh Thimnak Zung Fialning A Si Ko Lai_U Ling Kyaw

TCP Hakha| 2020 Feb. 4| Chin Party upa cheukhat kan konglam cu Ramkomh Thimnak Zung nih Satunglung le Palek hna sin in an kan hlathlai tiah CNLD upa chungtel U Kyaw Nyein nih a chimmi cu Ramkomh Thimnak Zung nih a herhmi a si ruangah an fialmi hna a si ko lai tiah Chin ramkulh thimnak zung chungtuan U Ling Kyaw nih a chim.

“Chin party pawl cu a hlan ah kan ithen. 2019 in Chin National Democratic Party (CNDP), Chin Progressive Party (CPP), Chin League for Democracy (CLD) tiin inntek khuami hna forhfialnak in Chin League for Democracy (CNLD) ah kan ifonh cang. CNLD kan ifonh cang caah zalong tein zeizong te kan tawlrel khawh lai tiah kan iruah. A luancia December 19 ah Satunglung (SB) pawl nih U Kyaw Nyein khoika dah na um ton kan in duh an ka ti. Ka umnak ka chimh hna I minung pathum an rak phan. Zei dah ka ti hna tikah na konglam kan herh an ka ti. Ka konglam vialte an lak. December 21 ah SBI an rak phan than. An pu Kyaw Myint U hruaimi an si. Ka konglam an ka hal than. Zei ruangah ka ti hna tikah Ramkomh Thimnak Zung (UEC) nih an ka halter an ti. Zei sualnak dah ka ngeih mah ti nan ka hal cu ka ti I UEC nih an ka halter ruangah kan in halmi a si tiah an ka ti. 2020 thimnak lai i kan tonmi harnak a si. Tlangcung party harnak kan tong rih te lai. Hi bantuk harnak kan lonh khawh lawngah mipi nih duhmi zalong tein an kan thim kan site lai. Tlangcung party pawl cu Panglon biakam silo in hnatlaknak tuanchuak dingin aa zuam cuahmahmi kan si” tiah Chin ramkulh Thingram lei Vuanci hlun U Kyaw Nyein nih The Chinland Post interview ah a chim.

Hi kong he pehtlai in CNLD Chairman Pu No Than Kap nih “ Party Register kan tuahmi zong thla(8) hnu lawngah an kan pekmi, atu bantuk in kherhhlainak an kan tuahmi hna hi anmah zung va kal hnawh lawngah an kan fianh khawh ding a si. Kanmah CNLD Chairman pathum cu hi bantuk kan tong hraw rih lo” tiah The Chinland Post ah a chim.

Chin ramkulh Thimnak Zung chungtuan U Ling Kyaw nih “Party Registration an tuah lio ah party cio nih EC minung (15) min cazin an pek chihmi a um. Cu hna konglam zohfel dingin Satunglung, thimnak zung le uknak zung lei nih a herhningin an konglam kan lakmi hna hna a um. Satunglung palek pawl zong kan sin ah a herhmi minung konglam an lak ve. Thimfung a thla dingmi vote cazin zong kan khawm cuahmah a si. Cozah le a dangdang kong ahcun a si lai lo. Thimnak lei rianngei ah aa telmi zung an si ve ruangah a herhningin an halmi hna a si lai” tiah The Chinland Post ah a chim.

2020 kum Kawlram thimnak kong he pehtlai in thimfung (mee) athla kho ding minung cazin khomsuatthannak le zohfelnak cu ramkulh ramthen thimnak zung, uknak zung, milu cazin tlaihnak (Lawakah) zung le fimcawnnak zung rianngei hna ibawmh in an khawmsuat cuahmah lio a si i a ralaimi 2020 March thla ahcun thimfung a thla kho ding cazin aa fiang lai tiah Chin ramkulh Thimnak zung in kan theih. +++