Gambia v. Myanmar Biacaihnak: ICJ Nih A Cohlang Lai Maw?
2022 February 26 — Ramkulh Kawlram ah minphun namneh cihhmihnak (Genocide) a tuah ko, a buar tiah Gambia ram nih a sualpuhmi (tazacuai) buainak cu International Court of Justice (ICJ) biaceihzung nih cohlan le ngaih (admissible) a si ko tiah biakhiah ahcun hi sualphawt bacaihnak le buainak hi biakhiahnak ding ah a kum in a rau kho rih tiah theih a si.
Gambia le Myanmar (Ramkomh Kawlram) tazacuainak cu vawleipi biacaihnak zung nih a cohlan ding le cohlan lo ding biakhiahnak nicaan a hun nai chin thluahmah cang.
A ra laimi February 28 ah Gambia ram nih sml. pakhat le cheu chung a chim than lai i mah hnu ah ICJ nih (admissible) biacaih dingmi, biacaih tlakmi a si le silo biakhiahnak a tuah lai tiah VOA nih a thanh.
Asinain, Ramkomh Kawlram lei nih an al, duhlonak an chimning in, ICJ nih mah hi miphun cihmihnak kongkau ah caihkhan chap ding a um lo, biakhiahnak nawl a ngei lo, Gambia zong nih chimnak nawl a ngei lo tiah bia a khiah ahcun a dihbeh dingmi a si ko lai. Sihmanhsehlaw, biaceihzung nih pehzulh in caihkhan dingmi a si, kan ngaih in tawlrel ko lai (admissible) a ti a si ahcun Genocide a si ko tiah halmi ah i alnak le khat le khat evidences pawl he biaceihnak an ngei rih lai tiah theih a si.
February 26 ah tuahmi ICJ ah a nithumnak biangeihnak ah Genocide a si ko tiah Gambia nih a chimmi cu Kawlram ralhrang phu aiawh thlahmi Ko Ko Hlaing nih biacheihnak nawl hi ICJ kut cungah a um lo bantuk in Gambia ram zong nih chimnak nawl a ngei lo tiah a ti caah ICJ zong rianhlei (Pressure) a pek le khinh bantuk he aa khat tiah an chim.
Atu bantuk in ICJ ah dohthlennak a tuah cuahmahmi National Unity Government (NUG) nih aiawh thlahmi cohlang lo in Ralkap palai an cohlanmi kong zong ah ICJ cu soisel a tong ngaingai tiah theih a si. NUG nih cun, kanmah nih kan aiawh lai tiah an ti. Cun, a luancia mi 2019 December ah Aung San Suu Kyi nih dirkamhnak a rak tuahmi zong kan let than tiah an thanh.
Asinain, ICJ nih tutan a voihnihnak Gambia v. Myanmar biacaihnak a hram an domh lio ah, Baicaihbawi nih tutan ah Ralkap palai nih Ramkomh Kawlram a aiawhmi hi a cozah tling a si cang, mizapi a aiawh cang hna kan ti caah a si lo. Gambia he tazacuainak hi cozah le cozah karlak tazacuainak a si lo. Ram le Ram a si caah, Ralkap palai nih an aiawhnak hi a si tiah a chim.
Baicaihnak kong ah cawlcangmi phu Rohingya lei le covo caah a dir i a cawlcangmi pawl nih cun, Ralkap nih mizapi palai an tuan kho lo, an aiawh kho lo tiah an chim.
Tutan ICJ ah ralkap palai nih aiawhnak a ngeih ruang ah, biacaihnak an tuahmah lio ah, Biacaihzung hmai in duhlonak langhternak zong mi cheukhat nih an tuah.
ICJ ah Ralkap palai nih aiawhnak an ngeihnak a ruang lak ah pakhat a simi cu ICJ nih tutan bacaihnak (hearing) kong he pehtlaihnak an tuahmi hi Belgium ah ummi Ramkomh Kawlram Embassy a si i, cucu Ralkap lei tang in an um caah a si tiah theih a si.#
About The Author
