Ramkomh Cozah Bu Nih Surkhua Cu Peng An Pek Cang

Tawk Tling Thang| 2019 April 23| Hakha peng chung ah a ummi Surkhua cu April 12 ah Myanmar ramkomh cozah bu nih Peng (Myo) an pek cang tiah kan theih.

Hi kong he pehtlai in Chin ramkulh cozah bu chimnak nawlngeitu Minister U Soe Htet nih, “Chin ramkulh ah cangkep peng (Myo) a ngei rih lomi cu Hakha peng lawng a si. Cucaah, Surkhua cu April 12 ah ramkomh cozah bu nih Peng (Myo) pek ding in an fehter cang. Amahbelte cu cozah riantuan kalning in ramkomh hluttaw ah record an tuah rih lai. Cu dih in cun a herh ning in Peng hunnak tuah a si te lai” tiah The Chinland Post ah a chim.

Hika ah Surkhua drone in an thlakmi video zoh khawh a si (Chris Aceu). 

 

Surkhua hi inn 370 hrawng an si. Taihne sii-inn, palek sakhaan le tanghra sianginn a umnak khua a si. Hakha le Matupi pehtlaihnak lampi cung ah a ummi khua a si. Hakha in khan 50 tluk aa hlat.

Chin ramkulh ah pengkulh (township) 9, pengkomh (district) 4 le peng (town) 11 a um cang. Pengkomh 4 cu; Hakha pengkomh (Hakha, Thantlang), Mindat pengkomh (Mindat, Kanpetlet), Matupi pengkomh (Matupi, Paletwa) le Falam pengkomh (Falam, Tedim, Tonzang) an si.

Peng (Myo) 11 cu; Tedim pengkulh chung ah Khaikam peng, Tonzang pengkulh chung ah Cikha peng, Falam pengkulh chung ah Rihkhawdar peng, Waibulah peng, Thantlang pengkulh chungah Hnaring peng, Matupi pengkulh chung ah Lailenpi peng, Rezua peng, Kanpetlet pengkulh ah Cindwe peng, Mindat pengkulh chung ah Makui-innnu peng le Paletwa pengkulh ah Sami peng, Hakha pengkulh ah Surkhua peng an um tiah theih a si.

Leave a Commnet

%d bloggers like this: