Ramkulh NLD Party Nih CNA Camp Victoria Um Mi Bawmhnak An Pek Hna

Salai Elvis|2020 January 22| Chin ramkulh NLD party tawlrelnak in Chin National Army (CNA) Victoria Camp ah ah va veh-vat pah in bawmhnak an pek chih hna tiah theih a si.

“Kan nih cu cozah kan si tik ah le kan mah Lairam a kilveng tu an si ve tikah khan zeidah an lawh tiin an sining kha va chawnhbiak khi an si ko i kut lawng in va kal a that ve lo caah laksawng tlawmpal te kan i put in kan chawnh hna a si.” tiah party EC chungtel Pu Mang Hlup nih TCP ah a chim.

Hi bawmhnak cu Chin ramkulh NLD cozah a kai hnu kum li chung an riantuan nak chungah voi khat bik tlawnkai le bawmhnak an pek hna zong a si i ramkulh Party EC biachahnak ngeih hnu ah a tubantuk in va chawnh biak le bawmhnak an pek hna hi a si.

A tangka in Ks.550,000, Facang tun (4), Pee tun (1), Chiti cuai 10 le Changreu (pawng-hmuk) 10 hrawng, Monkey Coffee le Teamix tibantuk an si.

“Camp Victoria a um mi hna caah inn lo an herh ngai. Inn 50 cu a tlawm bik sak a hau rih. Cun an tam pah tik ah inn le lo cu an herh ko. Mah pin ah eidin kong zong an har, cun mehthaw zong an ei kho tuk lo. Inn sak ding mi hi a chung tamh-moih nak chim lo a sak nak lawng ah sing 40 a dih ti si. Cucaah ka ruah mi cu ramleng lei um mi hna le hawilei kom, a phu in a um hna zong nih i bawmh cio in, inn zong sakpiak cio khawh hna ah cun a tha tuk hnga.” tiah tlawnkai ah a kal ve mi Party chungtel Jacob Thang nih TCP ah a chim.

Mah ni ah Hakha lei NLD party upa minung (7) hna le Thantlang peng party hotu (2) hna zong nih an zulh ve hna tiah theih a si. +++