Rammi Paoh Raltuk Cawn Le Ralkap Tlakter Ding In NLD Palai Nih Cozah A Forhfial
The Chinland Post| 2019 March 4| Mizapi nunnak a himnak caah phunghrampi nih a langhter bantuk in rammi paohpaoh raltuk cawn ding le ralkap tlakter ding ruah a herh kong nawlngeitu cozah NLD party in MP pakhat nih cozah a forhfial.
Atu ah mithah lainawnnak a tam ngai nain palek phu chungtel hna nih tuanvo laaknak tha a der ruang ah phunghrampi upadi pohmah 386 ning in “Rammi paohpaoh upadi fehtermi he aa tlak in raltuk cawnter ding le rampi runvennak caah ralkap riantuan ding tuanvo a ngei” timi hi ruah awk a si cang tiah NLD party in Pyithu hluttaw palai U Tin Htwe nih a chim.
Hika ah video file zoh khawh a si.
“Hihi rampi runvennak le mizapi khuasak nun himnak rian tuannak caah ruah a herhmi pakhat a si. Hihi rampi cozah nih papek in a tuan awk a si” tiah March 4 ah tuahmi Pyithu hluttaw tonpumhnak ah U Tin Htwe nih a chim.
“Phunghrampi upadi dal(8)nak pohmah 386 ah rammi paoh hi runvennak he pehtlai in a chung ah luh in riantuannak nawl a um. Cuti a um caah cu bantuk in ser a si lai maw? Cuti tuah lawnglawng ah mithah lainawnnak hi kan tlaihhip khawh lai. Mithah lainawnnak tlaihhip khawh lo ahcun zaukphung thlenremhnak lamthluan hi a herh ning tluk in a kal kho lai lo” tiah hluttaw tonpumhnak a dih hnu ah U Tin Htwe nih media sin ah a chim.
Atu ahhin khuapi le khuate ah tuanvo pekmi palek thazaang hi phunghram nakin a thader deuh ruang ah mithah lainawnnak ahlankan runvennak rian a tuan kho lo i mizapi runvennak caah fakpi in a hnorsuan. Ahlankan in runvennak a tuah lo caah Myanmar ram ah mithah lainnawk ahmuh hi kanmah cozah kai hnu in a tam khun tiah a chimchih.
Biatung a chuahpimi hluttaw ah ceih le ceih lo ding hnatlaknak an tuah i dohkalhtu an um lo. Cu ruang ah hluttaw ah ceihmai ding a si caah hi biatung kong ceihmai a duhtu palai paoh nih min rak pe cio uh tiah hluttaw speaker U T. Khun Myat nih a thanh.
Ref: Mizzima