Ramthen Le Ramkulh Pawl Phunghram Suainak Nawl UPDJC Nih A Lungtlin Pi
UPDJC
Salai Aung Aung| 2018 May 16| Ramkhel ceihmainak phichuak he aa ruang in tlukruannak, mah te khuakhan lairelnak hmuh khawhnak ding ah ramkulh pawl mah tein in phunghram sernak nawl cu May 12 ah tuahmi ramkomh remdaihnak kong ceihmainak committee pakhat a simi (UPDJC) nih an lungtlinpi cang tiah theih a si.
Cu ceihmainak ah aa telmi Bohmogyi Khun Ohka nih, “ramkulh uknak phunghram sernak nawl ngah timi hi ramkulh ah mah te khuakhan lailrelnak nawl hngalhpi khi a si” tiah Media pawl sinah a chim.
UPDJC nih tutan an ceihmi remkhel kong ahhin miphun tlukruannak, mah te khuakhan lairelnak, Federal ramkomh, Multi-Party Democracy hmanning tibantuk in biatlang pasarih an ceih i cu chung in biaknak le uknak thennak kong (Secular State) hi a buai deuh caah an chiah chung in biatlang paruk cu Ramkomh Remdaihnak Conference ah chuah pi a si lai tiah theih a si.
“Ramkulh pawl nih mah tein uknak phunghram pi sernak nawl lungtlinpi nak a um. Myanmar tuanbia ah a um bal rih lo mi a si. Ramkomh chung ah aa telmi ramkulh pawl hi anmah tein phunghram i sernaknak nawl pek a si ballo. Zei chan hmanh ah a um bal lo. A tu cu a um cang” tiah Bohmogyi Khun Ohka nih a chim.
Asinain ramkulh phunghram hi hman a si tikah ramkomh huap phunghram pi kha dohkalh in hman a ngah lai lo i alhnial awk thil a chuah sual ahcun ramkomh phunghram pi le uknak nawlngei pawl nih bia an chahmi tang ah a um lai tiin lungtlinnak an ngei.
KNU nih cun ceihmainak a kaimi upa pakhat nih, “biachahnak tuah mi chungah tlangcung miphun pawl nih a bik in kan duh mi ramthen le ramkulh ah mah tein phunghram i sernak ding covo kong aa tel caah lung lawmh awk tak a si. Cu zong cu kan dirhmun kha dotkhat a sang deuh ah kan kai i ramkomh sining muru tak tak pakhat a si caah kaa lawm ngai ngai” tiah ceihmainak cung ah a chim.
Ramkulh phunghram chung ah onhmi, ramkulh cozah, ramkulh hluttaw, ramkulh biaceih zung pawl hi phunghram he aa mil in hman khawh an si i upadi ning tein pek mi ramkulh chung nawlngeihnak hna cu ramkomh nih a tlangtlak nak nawl a um lo tiah theih a si.
“Shan ramkulh cozah khi thingkung cing than uh kan ti kho hna lo. Ramkomh Tittaw Minister pa hal ta a hau ti a si. Mah bantuk khan ramkomh le ramkulh kar ah nawlngeihnak fianghlang tein thenphawt mi a um lo tikah kan ram a thangcho kho lo. Ramkulh nih tuan khawhnak nawl angeihmi kha a fian ahcun cucu ramkomh cozah nih a chut kho than ti lo” tiah Bohmogyi Khun Oh Ka nih a chim.
Mah te khuakhan lairelnak kong ceih tikah ramkomh in hohmanh chuah ngah lo timi biafang kha ralkap lei nih telh chih an duh tiah ceihmainak a kai mi nih an chim.
“Tlangcung mi pawl nih kan chim lengmang mi miphun tlukruannak le mah te khuakhan lairelnak timi covo pahnih hi tlamtling um mi Federal ramkomh a si phot ahcun chuak uh, ramkomh ah i fon ti hlah tiin thawl hmanh ah hohmanh an chuak duh lai lo” tiah Khun Oh Ka nih a chim.
Kan rammi tu cu Federal Ramkomh Myanmar ti zong in ti khawh a si i Tatmadaw bel hi Federal min bunh dingah a buai kho mi a si caah ramkomh Tatmadaw ti zong in auh khawh a si ko tiah a chim fawn.
Tutan an ceih mi chung in hmailei ah ceihchap ding tiin an nganhpi pakhat cu ’ramkhel le biaknak cawh lo ding’, ‘Biaknak ah a hrambunh lomi ram a si lai’ timi cafiang pawl an si i an ceih tikah aa thuat i a fiang lomi te te a um caah an chiah chung tiah theih a si.
Ref: Irrawaddy
About The Author
