Re-Post | Thinlung In A Chuakmi Duhdawtnak Cu A Ngu Bal Lo” A Titu Tha Hlei Par Lennak|

The Chinland Post| 2019 February 13| The Chinland Post nih Chin ramkhel thiam upa, a kapkip in mifim kan ngeihmi hna kan pale ton biaruahnak kan ngeih hna pin ah Chin ramkulh cozah riantuan upa hna zong zapi rel khawh ding in ton biaruahnak kan ngeih hna. Atu tan cu mino nih rel le hngalh duhmi Chin ngaknu Mai Tha Hlei Par ( Aye Par) kan lennak le a konglam tawi kan rak langhter.

Vawleicung zungmawi riantuanmi hna le lemcang a thiammi hna nih Duhdawtnak cu a sullam a phunphun in an fianter cio hna. Epar nih cun “Thinlung chung in a chuakmi duhdawtnak cu a ngu bal lo” tiah a sullam a fianter.

Dawtnak timi cu a kau tukmi a si bantuk in careltu pakhat cio nih zei tin dah a sullam nan fianter cio, Aye Par nih a fiantermi hi zei tin dah nan ruah? Kau deuh le thuk deuh in nan ruah satmat a si ah cun a sullam thukpi in nan fianter khawh ko lai.

Aye Par cu Chin khualipi Hakha, Dawrthar sang, Cherry lam ah a ummi Pu Kep Chin le Pi Rem Vang nih fanu/pa 4 an ngeihmi lakah a hniang bik a si. Amah hi Mathematics major, Yadanapon-Mandalay in 2008 kum ah B.Sc a dihmi a si. 2012 kum ah LCCI a kai i Diploma Management Accounting zong a dihmi a si. Hakha Peng tamah zung ah cazi rian a tuan bal.

Amah a Khrihfa bu Zion Baptist Church nih an bochan ngai i CE tangka kengtu ah kum hnih chung an hman. Sianghleirun a kai lio, kum 2007 ah University Christian Fellowship zong ah ngunkengtu ah an rak thimmi le a rak tuanmi a si. A huam bikmi cu carel le T.V zoh a si.

Biaknak lei lawng si lo in Lai lam zong a thiam. 2009 Naypidaw, Union Day i Chinmi aiawh in “Rawlsawmtuk” laam ah a kalmi pakhat a si ve. Laam lawng si lo in fashion zong a thiam ngaingaimi a si. 2007 Sianghleirun a kai lio Major kip leengdawh zuamnak ah pakhatnak a rak hmuh. Hakha i Puai sunglawi a um caan paoh ah nunphung laam zong voi tampi a laam.

Lai nunphung kong bia kan hal i a kan lehmi cu, “Nihin ah cun Chin mino le kanmah le nunphung thil kan ngeihmi Laithil he kan sunhsak cio dih cang. Kan Laithil thuam nih miphun pakhat kan sinak a langter i a cawisan. Cucaah, kan Laithil thuam hi Chin mino nih cawisan le thanchoter chinchin i zuam hna usih” tiah a chim.

Chin mino thilhruk hruk-aihnak kong a hmuhning kan hal than i, “Mah le siarem ning ciote in i hruk-aih cio ding a si ko. Amah belte kan miphun thilthuam thlau lo le zei rel set lo in um lo ding hi a biapi tuk. Zarhpi ni Pathian biaknak innchung i sakat tawite le Jeans bawgbi i hrukaih kan hmanmi belte hi cu i thinh kho hna usihlaw, zalongte le aa tlak ning hoih in hruakaih thiam kan herh” tiah a ti.

Chin zatlang nun ah a uar bikmi cu, “Chiat ni/that ni kan ton tikah kan i chuah hnawhmi le kan i thutpimi hi ka uar.” tuk a ti. Ngaknu tlangval i thitum ding in i hal le i ham (engage) hi zei tin dah a sullam na fianter tiah kan hal. “i thitum ding ah i hal le i ham a si. A sullam cu kan karlak ah donkhantu um hna hlah seh ti duhnak caah a si” tiah a hmuhning a chim.

Na duhmi tlangval le na nu le na pa nih an in duhpiakmi i khat sual hlah sehlaw zei bantuk dah naa thim deuh lai tiah kan hal. A si khawh chung in ka nu le ka pa lungtlinpi ding in chimphuan khawh kaa zuam hmasa lai. An ka lungtlin pi bak lo a si ah cun nu le pa duhmi nak in keimah duhmi kaa thim kho lai tiah a hmai senduk bu le i nihter bu in a kan leh. Parcel cah kong kan hal than i a kan lehmi cu, aa hngal bal lomi parcel i cah cu ka uar lo tuk. Aa hngalciami le lungthin aa hmuciami paoh cu i cah ding a si ko tiah a ti.

Ngaknu tlangval duhnak zalam thluan ah i tlaihchannak nih maw i hngalhthiamnak nih dah duhdawtnak a fehter deuh tiah kan hal i ka caah cun i tlaihchannak nih dawtnak a fehter deuh tiah sau taktak aa ruah hnu ah a kan leh.

Careltu sin ah saduhthah chim na duhmi tiah kan hal i a kan lehmi cu, “Chinmi cu miphun fa, mitlawmte si ko hmanh usihlaw, hngerhte bang lungrualnak in ram le miphun caah rian kan tuan a si ah cun kan i ruahmi nak tam deuh in kan thangcho ko lai. Cucaah kan lungthin aa khah lonak le kan hmuhning aa khah lonak hi donkhantu ah ruah lo in ruahnak tha a kan petu le kuttum bang i fun a herhnak a kan hngalhtertu ah ruah khawh i zuam hna usih” tiah a ti.

Tha Hlei Par cu atu (2019) ahcun Cung Lian Thawng @Puvom he an i thitum i fa zong an ngei cang. Hi cabia cu a luancia  a ngaknut lio ah The Chinland Post nih biahalnak kan rak tuahmi kha zapi sin ah kan rak thanh thanmi  a si.