Reuters Thawnglatu Pahnih Thong Kum 14 Tiang Thlak Khawhmi Pohmah In Sualphawt An Si
MYANMAR TRIALS REUTERS JOURNALISTS
City Hunter| 2018 July 9| Rakhine ramkulh, Maungtaw pengkomh i mi thahnak kong a thanhtu Reuters thawnglatu Ko Wah Lung le Ko Kyaw Soe Oo cu a sangbik thongdan kum 14 tiang thlak khawhmi Myanmar ram cozah thlithup upadi pohmah in sualphawt an si.
Reuters thawnglatu pahnih cu July 9, Yangon chaklei pengkomh baiceih zung ah voi 29nak zung chuahpi an si i pengkomh biaceih bawizik nih Myanmar ram cozah thlithup upadi pohmah 3(1) (c) in thawnglatu pahnih cu tazacuai ding in biakhiahnak a tuah hi a si.
Myanmar hrambunh Reuters media zung in thawnglatu Ko Wah Lung le Ko Kyaw Soe Oo cu a luancia 2017 August thla chung i Rakhine ramkulh, Maungtaw pengkomh Endin khua ah humhimnak lei tuanvo latu ralkap hna nih pa 10 cu upadi lonh in an thah hna timi thawngpang an hlat lio 2017 December 12 zan ah an tlaih hna.
An tlaih hna hnu ah thawnglatu pahnih cu Mingalardon peng, Htauhgyan palek sakhan ah Myanmar ram cozah thlithup upadi pohmah 3(1) (c) in case (ahmuh) hunpiak an si i Yangon thlanglei pengkomh biaceih zung ah ya-za-tat-gyi ahmuh 4/2018 in ahmuh chekhlatnak an si.
Pengkomh biaceih zung nih palek tel in minung 22 tiang chekhlatnak an tuah hna hnu ah Reuters thlawnglatu pahnih cu atu bantuk in thlithup upadi pohmah in sualphawtnak biakhiahnak a tuah hi a si.
Myanmar rampi cozah thlithup upadi pohmah 3(1) (c) cu sualnak hmuh ahcun a sangbik thong kum 14 tiang thlak khawhmi pohmah a si.
Hi ahmuh kong he pehtlai in rampi ruahnak petu Daw Aung San Suu Kyi zong nhi Japan ram, Togyo hrambunh NHK media le interview pakhat ah Reuters thawnglatu pahnih cu Rakhine ramkulh kongkau an hlathlai caah tlaihmi an si lo. Rampi biathli thup an buar caah tlaihmi an si tiah a lehnak hna cu NHK media nih a luancia June 8 ahkhan an thanh.
Hi a hmuh he pehtlai in chekhlatnak tuahmi minung 22 lakah Doh-yehmu hlun Mo Yan Naing nih Reuters thawnglatu pahnih hi thong rap chiah in an tlaihmi hna a si. Hiti tlaihnak caah Ye-hmu-choh Tin Ko Ko tawlrelnak in tuahmi a si kong a luancia April 20 ahkhan tette biahalmi ah a chim.
Ref: Mizzima
About The Author
