Rezua ah CACC Nih Chin Miphun Ni An Tuah Piak Hna Lai

0

Salai CungCung|2020 January 20|  CACC (Chin Association For Christian Communication) tawlrelnak in Chin Miphun Ni cu Rezua khua ah an mah Rezua khua he i bawmh in an tuah lai tiah kan theih.

” CACC tawlrelnak in Rezua khua ah Chin Minphun Ni cu an khua mi he i bawmh in kan va tuah piak hna lai. Hi Chin Miphun Ni  tuahnak caah tangka bawmh hal ding tampi kan ngei. Kan mah CACC nih  Sing 20 lawng a kan chuah piak. Kan mah CACC lei nih Sing 50 dih ding in timh tuahnak kan ngei. Cun an mah lei zong committee an um ve i an mah tein timhtuahnak an rak ngei ve ko lai. Kanmah CACC zung lei nih Sing 20 chuah piak a si tik ah a tang mi Sing 30  bochan mi hna sin ah bawmh kan hal hna lai. Cun bawmhnak tam deuh kan hal khawh hna ah cun Lai Paih laksawng pawl zong tam deuh in kan tuah piak hna lai” tiah CACC Arts And Culture Department lutlai Rev.Dr. Khar Ling nih The Chinland Post ah a chim.

“Hi Chin Miphun Ni ah kan mah lei nih timh tuahnak kan ngeih piak mi hna cu, Lai Paih kan tuah lai, Lai lam hmuhsaknak um lai, Hlasak thiam  kan sawm hna, special talk ah minung pathum kan sawm hna. Sound system le a herh mi dang dang vialte kan mah nih tuanvo kan lak dih lai. Cucaah tangka hi Sing 50 hrawng a dih lai tiah kan ruah mi cu a si. Cu hmanh cu tlung kalnak tete mah tein i rinh pah ding in kan ti. Tubantuk in khuate lei ah Chin Minphun Ni kan tuah piak hna hi a voi khatnak a si. Hmailei ah pengkip ah hin pehzulh in CND tuah piak khawh siseh tiah saduhtatnak kan ngei. CND timi cu kan mah Lai Minphun Ni a si caah cheukhat Khirhfa mi hna nih cun zei dah ma hi tuah a herh tiin a ruah mi zong an um, nain kan mah nih Ni sungluai te kan ngeih mi te a si caah kei mah duhnak ah cun khuate um mi zapi nih khuapi CND kan va kal kho lo tal ah kan mah kan khua le kan ram te ah khirhfa phun ning tein thlacaamnak he tuah cio ko uh sih ti ka duh ngai. Khuate lei tuah kho lo hmanh ah khuapi tal ah cun CND  tuah hrimhrim ding a si. Kan phun kan lam zong chim rel ding, kan Lai lam zong hmuhsaknak tuah ding, kan nunphun vialte zong hmuhsaknak ngeih zungzal ding in Kan Chin Miphun Ni hi thazaang kan pek awk a si  ” tiah Rev. Dr. Khar Ling nih a chim chap.

Hi Rezua Chin Miphun Ni ah sawm mi hna cu hlasaknak ah kawlram chung minthang Ni Len Par Mawi, Laitlang chung in Paling, Van Siang Mang, Cung Hlei Lian an si. Cun special talk ah CHRO director Van Biak Thang, biaknak lei in Rev.Dr.Lal Pek Lian, cun CACC zung in upa pakhat an si lai. Lai lam hmuhsaknak ah hin IBC khirhfabu mino an si tiah kan theih.

CACC nih  kan hnu kum lei pi ah Gangkaw ah le Matupi  Chin Minphun Ni tuah mi ah an va tel pi khawh hna . Cun kan hnu kum Hakha CND zong ah Lailam, Paih ti bantuk ah tlangtlak piak hna. Tu kum hi Razua ah CND tuah piak an timh hi a si tiah kan theih. +++

 

About The Author

Na ruahning rak langhter ve.. (Leave a comment)

%d bloggers like this: