Rezua khuapi an khua ning in an zam
Post Staff| 2022 February 6 — Matupi peng, Rezua khua cu an khua ning in Mizoram ah an tlik tak dih tiah theih a si.
2021 October hramthok hrawng ah Chinland Defense Force (CDF) nih Rezua khua cu kulh hram an i thok caah Kawl ralkap nih a pawngkam inn pawl cu kah thlorh in an kah caah tlik hram an thoknak hi a si tiah Zalen nih a tial.
2022 January thla thok in Kawl ralkap nih thazang chap le, Matupi peng chung ummi minung 10 hrawng hramhram in thah an ton lawng si loin Matupi-Rezua karlak ah kahdohnak a chuah lengmang caah an chuaktak dihnak hi a si tiah theih a si.
“Rezua hi an ningpi ngawt in zam dih ti khan a si ko cang. Ralhrang ralkap pawl hi an umnak buk (sakhan) chung in an rak chuak kho i, Rezua khuapi chung luhchuah khamnak (gate) zong an i tuah cang” tiah CHRO riantuantu nih a chim.
Kawl ralhrang ralkap hi cu an camp (sakhan) chung lawngte ah an um. Nain, Matupi in a lang hlat in Meithal ngan, bom ngan in an kah ruang ah ralkap pawl hi an chuak kho than. Cucaah, Rezua khuami hi an zaam nak a si tiah theih a si.
Rezua khuapi hi inn 800 hrawng khuasa an si i an ningpi nawn in an zam dih leng ah, a kiangkap khuate 7 hna zong Mizoram lei ah an tli dih tiah Zalen thawngzamh nih a ṭial.
Hakha le Matupi karlak ah a ummi Rezua khua cu 2002 SPDC ralkap cozah chan ah khuapi sinak an rak pekmi a si i, Ralkap zong umhmun an khuarnak a si. #
About The Author
