Riantuan tikah thiamnak phun hnih

Kan i siamremh hlan deuh ah thanchonak nih a kan luh phuat. Kan hmunhma ah rian phunphun an lut thluahmah. Kan thiamnak nih a tlinh lomi rian cu miphun dang nih an laakmi a tam. Hi riantuannak ahhin a tlangpi in phun hnih zoh ti hna usih: Soft skills le Hard skills tiah Mirang nih an ti.

Rian thiamnak (Hard skills): Rian pakhat kan sok tikah cu rian nih a herh bakmi, cu rian he aa pehtlaimi thiamnak kan ngeihmi kha a sawh duhmi a si. Cawn hnu ah thiammi (tahchunhnak: technical skills) kha a chim duh. Computer lei, cazin tlaih le tuak lei, mei ser lei ti bantuk thiamnak pawl kha an si.

Tuan thiamnak (Soft skills): Kampani pakhat ah a bu in minung pakul hrawng rian kan tuan ti hna. Kanmah le kan rian cio ah tuanvo kan ngei i cucu kan tuah cio. Asinain, midang he rian kan tuan thiam lo, kan cawlcangh thiam lo ahcun rian hma a kal lo. Chawnhbiak thiam hna a herh; mah duhnak lawng si loin midang duhnak zong zoh thiam hna a herh; mah nih chim lawng si loin midang chim caan ah ngaihpiak tehna a herh. Thil a canning in tawlrel thiam hna a herh. Cu vialte thiamnak cu kan rian a tlamtlin khawhnak dingah a rak herhmi thiamnak an si. Kan rian kan tuan khawhnak dingah thiamnak biapi an si caah cucu ‘soft skills’ timi a si.

Kawl nih ‘a-leih-theih’ an ti i Lai holh in ‘fim, fimkhur’ kan ti hnga maw? Khite hna zong khi ‘soft skill’ pakhat a rak si ve.

Tuchan riantuannak ahhin ‘hard skills’ lawng a za ti lo. A cheu kampani le rian ngeitu hna nihcun ‘soft skills’ tam deuh a thiammi kha an thim tawn hna.

Rian he aa pehtlaimi thiamnak lawng a za ti lo; cu rian cu tlamtling tein mibu he tuan thiamnak zong kha kan thiam, kan kawl chih a herh. Tuan thiamnak hi mah tein thiam khawh a si. – Salai Van Biak Thang