Rihkhawdar Inn 8 Kangh Ruang Ah Aa Hliammi Tanghra Siangngakchia Nu A Thi
City Hunter| 2018 April 26| Falam peng, Rihkhawdar Myo No.2 sang, inn 8 a kangh ruang i meikangh in aa hliammi tanghra siangngakchia Mai Ngun Siang Sin cu April 24 zan suimilam 11:00 tluk, Kalay- Royal City sii-inn ah a thi.
Hiti mei a kangh ruang ah Pu Biak Kulh fanu Ngun Siang Sin (kum 17) cu a pumpuluk ti awk in mei nih a hliam caah Rihkhawdar taih-ne sii-inn ah an kalpi i an thlopbul colh. Rihkhawdar sii-inn i aa thlop nain a hma a fah tuk caah Kalay- Wisley sii-inn le Royal City sii-inn i aa thlop cuahmah lio ah atu bantuk in a thih hi a si.
Mai Siang Sin hi tanghra camipuai a phi i sungh- awn result a ngah lio caan ah atu bantuk in vanchiat thihlonak a ton hi a si. A ruak cu Rihkhawdar ah an tlunpi i April 26 zanlei ah Khrihfa biaknak phungningte in an vui tiah theih a si.
A kanghning cu, No.2 sang, Bogyoke lampi cung ah inn a hlangmi Pu Ngun Hlei Thawng (a pa Pu Biak Kulh) dawrkhaan i a ummi gas a zutmi in kangh hram aa thawk. Cuti mei a kangh ruang ah chawlehthalnak zung inn pakhat, minung umnak dothnih inn 5, dotkhat inn 2, a zapi inn 8 a kaang.
Mei a kaangmi cu zanlei suimilam 5:00 ah a dai. Hi inn a kangh ruang ah innchungkhar 6 in pa 23, nu 25, an zapi minung 48 cu umnak inn an ngei ti lo. Naihniammi chungkhar sin ah caankarlak chung an thial chung hna. Mei kangh ruang ah sunghmi zapi hi ks. sing 70 hrawng a si. Mei daithlang in ahmangtu Pu Ngun Hlei Thawng cu Rihkhawdar palek sakhaan nih ya-za-tat-gyi pohmah 285/338 in ahmuh an hunpiak tiah theih a si.
Ref: Iprd Rihkhawdar
About The Author
