Rihkhawdar Khua Ti An Har Caah Rih Tidil Ah Dinti An Than
Salai Elvis | 2019 February 1| Falam peng India ramri a si mi Rihkhawdar khua cu tukum January thla in ti an har caah Rih tidil ah khuami dinti a thanmi zong an um manh cang tiah khuabawi pakhat sinin kan theih.
“Tihna pakhat te hi kan hman mi a si i a bik in tihna a der tuk cang caah ti khonnak ti inn ah ti aa dilmi a tlawm tuk ruang ah a si. Zing le zanlei ah sumilam 1:30 chung ti an kan pekmi chungah sipin nih an kan thenphawt than i pipa pakhat ah inn 10 hrawng i bawm in kan i donh cio hna. A caan ahcun a ting lo mi zong an um thiam. Kumdang zongah kan har ko nain a tubantuk ah hin kan har tuk rih lo i March-April thla chungah cun kan har peng ko. Tukum cu January thla in khan kan har pah cang i a tu hi Rih tidil zong ah Cycle in dinti a than mi zong an um cang” tiah Rihkhawdar No.1 khubawi Pu Chan Lian nih The Chinland Post ah a chim.
Rihkhawdar khua cu kumchiar ti awk in dinti an har caah rampi khual lian le vuanci hna an khua an phak fate a pakhatnak bik ah dinti kong hi an hal peng ko hna nain a tuni tiang tuahpiak le bawmhchanh a um rih lo tiah kan theih.
“NLD cozah a kai hnu ah hin President U Htin Kyaw zong Rih a phan cang. Cun Vice President Pu Henry Van Thio zong voi thum a phan cang. Cupin ah ramkomh lei in khuallian le a luancia December 20 lio zongah ramrilei kongkau ramkomh vuanci Yee Aung a rat lio zongah kan hal thiam. Daw Aung San Suu Kyi a rat lio i khuami nih thil kan halmi cu ca in kan pek i cu chung zongah ti kong aa tel thiam. An rak tlun chiarte a pakhatnak bik ah ti kong hi kan hal pengmi hna an si ko nain a tu tiang cu a phi pek le zei tuahpiak a um rih lo. Ti kan har tuk tiah nai zarh chungah khan Penguk zung, Sipin le tuanvo ngeitu hna he zeitin dah kan tawlrel lai tiah kan va zoh i hmundang in ti a rak chuak mi tete kha pumpak cio nih pipa kan cawk cio i cucu ti konnak ti inn ah kan fonh than hna i tlawm te cu kan i ning deuh ko, nain duh ning cun kan i za hlei lo” tiah Pu Chan Lian nih a chim.
About The Author
