Rihkhawdar Khuami Nih VP Pu Henry Van Thio Sinnah Thil Phun Thum An Hal

The Chinland Post| 2018 October 2| September 29 ni ah Vice President Pu Henry Van Thio cu Rihkhawdar khua a phan i khua mi hna nih a tlangpiin thil phunthum an hal tiah kan theih.

Phunkhatnak; ngandamnak kong ah Teih-ne siizung ah X-ray chiah piak ding, siizung pawngkam kulhpiak ding, siizung riantuantu hna umnak inn (quarter’s) sak piak ding, siizung mizaw an tam caan ah an i tlum lo i inn thar sakpiak ding le Ambulance mizaw phurhnak motor hna hi ngandamnak lei ah an hal mi a si.

Pahnihnak ah dinti laknak caah meng (khan) 20 tluk aa hlatnak hmun Ks. sing 20 dih in le letmah 4 tluk ti pape in lak piak ding le pathumnak ah minung tampi a tlum mi Hall sak piak ding hna hi an hal mi a si.

“Kan hal mi chungah tuanvo ngeitu vuanci pawl hna nih an kan leh colh mi cu X-ray, siizung riantuantu hna umnak inn (quarter’s) le siizung kulh piakding pawl hi an kan leh colh mi a si. Cun mizawphurhnak motor cu Taih-ne siizung ah cun aa tlak rih lo an ti ko nain Vice President nih hi hmun cu khuakikan le lamlesul a harnak a si caah mizawphurhnak motor zong ruahpiak dingin tuanvo ngeitu hna sin ah a chimh hna.

Hall saknak ding hmun zong a hmunhma rak hawl chung u law 2019-2020 tangka kum ah kan rakzoh than te lai a kan ti” tiah Rihkhawdar sangthen No.1 khuabawi Pu Chan Liana nih TCP ah a chim. +++

Na ruahning rak langhter ve.. (Leave a comment)

%d bloggers like this: