Rohingya Cung Ah Myanmar Ralkap Sualnak Lam Hnih In Hlathlai Ding Tiah UN Nih An Chim

Salai Aung Aung| 2018 May 2| UN Humhimnak Council palai phu nih Cawn Nihnih Ni Naypyidaw i an tuah mi thawngfianhnak ah Rohingya Muslim pawl cung i Myanmar cozah ralkap nih minung covo an buar nak kong hi Myanmar cozah nih tuanvo lak i a herh ning bantuk in hlaitlainak tuah awk a si tiah an chim.

Hihi UN Palai pakhat asi ve mi Karen Pierce nih a chim mi a si. Hlathlainak hi phun hnih in tuah a herh. Pakhat nak cu ICC (International Criminal Court) ah taza cuainak le a dang pakhat cu Myanmar Cozah nih tuanvo lak in kherhlai ding a si.

Cu leng ah State Counsellor Daw Aung San Suu Kyi zong nih aherh mi hlathlainak ka tuah ko lai tiin bia a kan kamh tiah a chim.
UN Humhimnak Council palai pawl hi nizan zingah Rakhine ramkulh an va phan i Rakhine ramkulh chung um Rakhine miphun, Hindu le Muslim pawl sinah thilsining zeimawzat an va hlat. Hika a ummi ralzaam pawl himbawm tein an um khawhnak ding le Bangladesh lei a ummi hna zong an rat nak ram (Myanmar) ah himbawm tein an kir khawhnak ding a biapi tuk tiah an chim.

Daw Aung San Suu Kyi nih cun April 30 i UN palai pawl he tonnak an ngeih lio ah, kherhlai cang mi paoh cu Myanmar ah kir ter ding in Myanmar cozah leikap timhcia an si nak kong le hi rian ah UN siseh Bangladesh an si ah i bawmh cio ding a herhnak kong a chim.

Cu ni thiam ahcun Ralkap bawizik Bogyokehmogyi Min Aung Hlaing nih UN nih sual nan kan puhmi ralkap pawl i nu tlaihhremnak hi kannih biaknak ah cun fih a tlai mi thil a si i hi bantuk thil a tuah mi cu fak piin dank an tat hna tiah a chim.
Ref: RFA Burmese

Leave a Commnet

%d bloggers like this: